ໃນລະຫວ່າງວັນທີ 2 – 4 ເມສາ 2018, ອົງການກວດສອບແຫ່ງລັດ ສປປ ລາວ ໄດ້ເຄື່ອນໄຫວວຽກງານຕ່າງປະເທດ, ຊຶ່ງນໍາໂດຍ ທ່ານ ປອ.ນ. ວຽງທອງ ສີພັນດອນ, ປະທານອົງການກວດສອບແຫ່ງລັດ ພ້ອມດ້ວຍຄະນະ ເພື່ອເຂົ້າຮ່ວມພິທີເປີດຫ້ອງການກອງເລຂາອາຊຽນຊາຍ (Launching of ASEANSAI Secretariat Office), ກອງປະຊຸມສໍາມະນາໃນຫົວຂໍ້: ຄວາມເຂົ້າໃຈຂອງອາຊຽນຊາຍ ຕໍ່ກັບເປົ້າໝາຍການພັດທະນາແບບຍືນຍົງ (ASEANSAI SDGs Awareness), ກອງປະຊຸມພົບປະ ແລະ ປຶກສາຫາລືລະຫວ່າງ ອາຊຽນຊາຍ ກັບຜູ້ໃຫ້ທຶນ (Donor Coordination Meeting). ບັນດາກິດຈະກໍາດັ່ງກ່າວ ແມ່ນໄດ້ຈັດຂຶ້ນທີ່ນະຄອນຫຼວງ ຈາກາຕ້າ, ປະເທດສາທາລະນະລັດ ອິນໂດເນເຊຍ. ຈຸດປະສົງໃນການເຄື່ອນໄຫວວຽກງານຕ່າງປະເທດຄັ້ງນີ້ແມ່ນ ເພື່ອເປັນປະທານຮ່ວມກັບ ອົງການກວດສອບປະເທດອິນໂດເນເຊຍ ໃນພິທີເປີດຫ້ອງການກອງເລຂາອາຊຽນຊາຍ ໃນນາມ ອົງການກວດສອບແຫ່ງລັດ ສປປ ລາວ ເປັນປະທານຂອງອາຊຽນຊາຍ ແລະ ອົງການກວດສອບປະເທດ ອິນໂດເນເຊຍ ເປັນຫົວໜ້າກອງເລຂາ, ຊຶ່ງການສ້າງຕັ້ງຫ້ອງການຂອງກອງເລຂາອາຊຽນຊາຍ ແມ່ນເພື່ອເປັນສູນລວມ ແລະ ເປັນເສນາທິການໃຫ້ແກ່ປະທານອາຊຽນຊາຍໃນການຈັດຕັ້ງປະຕິບັດວຽກງານຂອງອາຊຽນຊາຍ. ພາຍຫຼັງສໍາເລັດພິທີເປີດ ຫ້ອງການກອງເລຂາອາຊຽນຊາຍ ກໍ່ໄດ້ສືບຕໍ່ເຂົ້າຮ່ວມກອງປະຊຸມສໍາມະນາໃນຫົວຂໍ້: ຄວາມເຂົ້າໃຈຂອງອາຊຽນຊາຍ ຕໍ່ກັບເປົ້າໝາຍການພັດທະນາແບບຍືນຍົງ; ຊຶ່ງກອງປະຊຸມສໍາມະນາດັ່ງກ່າວນີ້ ເປັນກິດຈະກໍາບູລິມະສິດໜຶ່ງຂອງແຜນຍຸດທະສາດອາຊຽນຊາຍ ໃນການສະໜັບສະໜູນປະເທດສະມາຊິກອາຊຽນຊາຍ ເພື່ອກ້າວສູ່ຄວາມສໍາເລັດໃນການປະຕິບັດເປົ້າໝາຍການພັດທະນາແບບຍືນຍົງ.


ພ້ອມດຽວກັນນັ້ນ, ຍັງໄດ້ສືບຕໍ່ເຂົ້າຮ່ວມກອງປະຊຸມພົບປະ ແລະ ປຶກສາຫາລືລະຫວ່າງ ອາຊຽນຊາຍ ກັບຜູ້ໃຫ້ທຶນ ເພື່ອນໍາສະເໜີທິດທາງແຜນການເຄື່ອນໄຫວ ວຽກງານຂອງອາຊຽນຊາຍ ຕໍ່ບັນດາຜູ້ໃຫ້ທຶນ ເພື່ອປຶກສາຫາລື ແລະ ຍາດແຍ່ງເອົາການສະໜັບສະໜູນຈາກບັນດາຜູ້ໃຫ້ທຶນ ເພື່ອສ້າງຄວາມເຂັ້ມແຂງ ໃຫ້ບັນດາ ສະຖາບັນກວດສອບສູງສຸດອາຊຽນ.
ນອກຈາກນັ້ນ, ທ່ານ ປອ.ນ. ວຽງທອງ ສີພັນດອນ, ປະທານອົງການກວດສອບແຫ່ງລັດ ໄດ້ເຂົ້າຮ່ວມກອງປະຊຸມພົບປະສອງຝ່າຍລະຫວ່າງ ອົງການກວດສອບແຫ່ງລັດ ສປປ ລາວ ແລະ ອົງການກວດສອບແຫ່ງ ສາທາລະນະລັດ ອິນໂດເນເຊຍ ເພື່ອເພີ່ມທະວີສາຍພົວພັນຮ່ວມມືລະຫວ່າງກັນໃຫ້ນັບມື້ນັບຂະຫຍາຍຕົວ ແລະ ມີປະສິດ ທິຜົນສູງ ໂດຍການທົບທວນກ່ຽວກັບການຈັດຕັ້ງປະຕິບັດແຜນການຮ່ວມມືສອງຝ່າຍໃນໄລຍະຜ່ານມາ ແລະ ແຜນການຮ່ວມມືສອງຝ່າຍໃນໄລຍະ 3 ປີຕໍ່ໜ້າ (2018-2020) ເຊີ່ງທັງສອງຝ່າຍເຫັນດີໃຫ້ມີການພົບປະຢ້ຽມຢາມ ແລະ ແລກປ່ຽນໃນລະດັບການນໍາຂັ້ນສູງຂອງສອງອົງການກວດສອບແຫ່ງລັດ; ການແລກປ່ຽນບົດຮຽນ ໃນ ລະດັບວິຊາການ ແລະ ການຝຶກອົບຮົມດ້ານການກວດສອບພາກລັດ ແລະ ກວດກາຄຸນນະພາບຜົນການກວດສອບ; ສະໜັບສະໜູນເຊິ່ງກັນ ແລະ ກັນໃນການເຄື່ອນໄຫວວຽກງານໃນເວທີສາກົນ.


ຄົ້ນຫາ

Login Form

Month