ກອງປະຊຸມເປີດກວ້າງວຽກງານກວດສອບ ປະຈຳປີ 2015 ໄດ້ຈັດຂຶ້ນ ໃນວັນທີ 16-17 ມີນາ 2016 ທີ່ໂຮງແຮມດອນຈັນພາເລດ, ນະຄອນຫລວງວຽງຈັນ ໂດຍເປັນກຽດເຂົ້າຮ່ວມເປັນປະທານ ຂອງ ທ່ານ ດຣ. ນ ວຽງທອງ ສີພັນດອນ ກຳມະການສູນກາງພັກ ປະທານ ອົງການກວດສອບແຫ່ງລັດ ແລະ ຮອງປະທານ ອົງການກວດສອບແຫ່ງລັດ. ເຂົ້າຮ່ວມກອງປະຊຸມປະກອບມີ ບັນດາຮອງລັດຖະມົນຕີ ຈາກບັນດາກະຊວງ, ຮອງປະທານອົງການ, ຮອງເຈົ້າແຂວງ, ຮອງເຈົ້າຄອງນະຄອນ, ຫົວໜ້າກົມຂອງ ບັນດາກະຊວງ-ອົງການ, ຫົວໜ້າພະແນກການ, ຂັ້ນທ້ອງຖິ່ນ, ຫົວໜ້າໂຄງການ, ຜູ້ອຳນວຍການ ທະນາຄານ ແລະ ວິສາຫະກິດຂອງລັດ, ອົງການກວດສອບປະຈຳພາກ ພ້ອມດ້ວຍພະນັກງານ - ລັດຖະກອນ ອົງການກວດສອບແຫ່ງລັດ ແລະ ແຂກຖືກເຊີນເຂົ້າຮ່ວມ ຈຳນວນ 349 ທ່ານ.


ຈຸດປະສົງຂອງກອງປະຊຸມແມ່ນເພື່ອ:
1) ທົບທວນຄືນການຈັດຕັ້ງປະຕິບັດ ບົດສະຫຼຸບຂາດຕົວການຈັດຕັ້ງປະຕິບັດ ຂອງງົບປະມານແຫ່ງລັດ ປະຈຳສົກປີ 2013-2014, ລາຍງານການເຄື່ອນໄຫວວຽກງານ ອົງການກວດສອບແຫ່ງລັດ ປະຈຳ ສົກປີ 2015-2016 ແລະ ທິດທາງແຜນການ ປະຈຳສົກປີ 2015-2016.
2) ຄົ້ນຄ້ວາ, ວິທີການ ແລະ ມາດຕະການໃນການແກ້ໄຂ ປະກົດການຫຍໍ້ທໍ້ທາງດ້ານການເງິນ ແລະທາງດ້ານງົບປະມານແຫ່ງລັດ ເພື່ອປະກອບສ່ວນ ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດໃຫ້ ມີຄວາມເຂັ້ມແຂງ ແລະ ໂປ່ງໃສ.ກອງປະຊຸມໄດ້ຮັບກຽດໂອ້ລົມ ແລະ ໃຫ້ທິດຊີ້ນຳ ຈາກ ທ່ານ ດຣ. ບຸນທອງ ຈິດມະນີ ກຳມະການກົມ ການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ຫົວໜ້າອົງການຕ້ານ ການສໍ້ລາດ ບັງຫຼວງຂັ້ນສູນກາງ ປະທານອົງການກວດກາລັດຖະບານ, ຊຶ່ງໄດ້ຊີ້ນຳໃຫ້ຫົວໜ່ວຍງົບປະມານ ທຸກຂັ້ນ, ບັນດາວິສະຫະກິດ, ທະນາຄານ ແລະ ອົງການ ທີ່ຄຸ້ມຄອງໂຄງການເງິນກູ້ຢືມ ແລະ ຊ່ວຍເຫຼືອລ້າ ຕະຫຼອດຮອດທຸກຂະແໜງການຢູ່ສູນກາງ ແລະ ທ້ອງຖິ່ນ ຈົ່ງໃຫ້ການຮ່ວມມື ແລະ ອຳນວຍຄວາມ ສະດວກ ໃຫ້ແກ່ ອົງການກວດສອບແຫ່ງລັດ ໃຫ້ສາມາດເຄື່ອນໄຫວວຽກງານຕາມພາລະບົດບາດ, ໜ້າທີ່ ແລະ ຄວາມຮັບຜິດຊອບຂອງຕົນໄດ້ຢ່າງ ເຕັມສ່ວນ, ອັນສຳຄັນແມ່ນ ບໍ່ໃຫ້ປິດບັງຂໍ້ມູນ, ບໍ່ສ້າງຄວາມຫຍຸ້ງຍາກ ທີ່ຈະເປັນການກົດດັນ ແລະ ຖ່ວງດຶງຂະບວນການກວດ ສອບຂອງ ອົງການກວດສອບແຫ່ງລັດ.


ຕໍ່ກັບຜົນການກວດສອບ ທີ່ອົງການກວດສອບແຫ່ງລັດ ໄດ້ດຳເນີນການເຄື່ອນໄຫວກວດສອບ ໃນແຕ່ລະສົກປີຕ້ອງມີການຕິດຕາມກວດກາ ແລະ ປະເມີນຜົນຢ່າງເປັນປະຈຳ ບັນຫາໃດທີ່ ຫົວໜ່ວຍ ງົບປະມານໄດ້ແກ້ໄຂແລ້ວ ແລະ ບັນຫາໃດທີ່ຍັງບໍ່ໄດ້ຮັບການປັບປຸງ ແລະ ແກ້ໄຂ, ຍ້ອນສາເຫດໃດ, ເງື່ອນ ໄຂ ແລະ ປັດໃຈອັນໃດ ຈຶ່ງບໍ່ສາມາດປະຕິບັດໄດ້ ແມ່ນໃຫ້ລາຍງານລັດຖະບານ ແລະ ສະພາແຫ່ງຊາດ ຮັບຊາບເປັນແຕ່ລະໄລຍະ .ກອງປະຊຸມໄດ້ຮັບຟັງການລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳສົກປີ 2013-2014, ລາຍງານການເຄື່ອນໄຫວວຽກງານ ຂອງອົງການກວດສອບແຫ່ງລັດ ປະຈຳສົກປີ 2014 -2015 ແລະ ທິດທາງແຜນການ ປະຈຳປີ 2015-2016.ກອງປະຊຸມໄດ້ຮັບຟັງການປະກອບຄຳຄິດຄຳເຫັນ ຂອງບັນດາທ່ານຜູ້ແທນກອງປະຊຸມ, ຊຶ່ງໄດ້ມີ ຄວາມເປັນເອກະພາບຕໍ່ກັບການລາຍງານ ແລະ ທິດທາງການເຄື່ອນໄຫວວຽກງານ ຂອງອົງການກວດສອບ ແຫ່ງລັດ ແລະ ແຕ່ລະພາກສ່ວນທີ່ກ່ຽວຂ້ອງ ເຊັ່ນ: ກະຊວງການເງິນ, ກະຊວງແຜນການ ແລະ ການລົງທຶນ ບັນດາກະຊວງ, ອົງການ, ແຂວງ, ນະຄອນຫຼວງວຽງຈັນ ແລະ ພາກສ່ວນອື່ນໆ.


ຄົ້ນຫາ

Login Form

Month