ໃນລະຫວ່າງວັນທີ 8 - 12 ມິຖຸນາ 2013 ທ່ານ ດຣ. ນາງ. ວຽງທອງ ສີພັນດອນ ປະທານອົງການ ກວດສອບແຫ່ງລັດ ພ້ອມດ້ວຍຄະນະ ໄດ້ເດີນທາງ ໄປນະຄອນຫຼວງມົດສະກູ ເພື່ອເຄື່ອນ ໄຫວພົບປະ ແລະ ເສີມສ້າງສາຍພົວພັນຮ່ວມມື ສອງຝ່າຍ ລະຫວ່າງ ອົງການກວດສອບແຫ່ງລັດໃນ ນາມເປັນສະຖາບັນ ກວດສອບສູງສຸດ ແຫ່ງ ສປປ ລາວ ແລະ ສະພາການບັນຊີ ໃນນາມເປັນ ສະຖາບັນກວດສອບສູງສຸດ ສະຫະພັນລັດເຊຍ.


ໃນກອງປະຊຸມພົບປະສອງຝ່າຍ, ຜູ້ນຳຂອງທັງສອງສະຖາບັນກວດສອບສູງສຸດ ໄດ້ແລກປ່ຽນຄຳຄິດ ຄຳເຫັນກ່ຽວກັບການພົວພັນຮ່ວມມືສອງ ຝ່າຍທາງດ້ານ ວຽກງານກວດສອບ, ຊຶ່ງ ທ່ານ ດຣ.ນ. ວຽງທອງ ສີພັນດອນ ໄດ້ຍົກໃຫ້ເຫັນກ່ຽວກັບການເຕີບໃຫຍ່ຂະຫຍາຍຕົວ, ຜົນຂອງການກວດສອບ ແລະ ຂໍ້ຄົງຄ້າງ ໃນການເຄື່ອນໄຫວວຽກງານກວດສອບ. ສຳລັບຝ່າຍ ລັດເຊຍ, ເຊິ່ງນຳໂດຍທ່ານ Sergey V. Stepashin ຫົວໜ້າສະພາການບັນຊີ ສ.ລັດເຊຍ ໄດ້ຍົກໃຫ້ເຫັນກ່ຽວກັບການເຄື່ອນໄຫວກວດສອບໃນຂະແໜງຕ່າງໆ. ຈາກນັ້ນ, ຄະນະທັງສອງຝ່າຍ ໄດ້ປຶກສາຫາລືກ່ຽວກັບທິດທາງການຮ່ວມມືໃນຕໍ່ໜ້າ ເພື່ອເສີມສ້າງສາຍ ພົວພັນມິດຕະພາບ ແລະ ການຮ່ວມມືດ້ານການກວດສອບໃນຂົງເຂດຕ່າງໆ. ພ້ອມນັ້ນ, ທັງສອງຝ່າຍກໍ່ໄດ້ ພ້ອມກັນລົງນາມ ໃນຂໍ້ຕົກລົງວ່າດວ້ຍການຮ່ວມມືສອງຝ່າຍ ໂດຍໄດ້ກຳນົດທິດທາງການພົວພັນ ເຊັ່ນ: ທັງສອງຝ່າຍຈະສືບຕໍ່ແລກປ່ຽນຄະນະຜູ້ແທນຂັ້ນສູງ ແລະ ຄະນະວິຊາການ ຢ່າງ ເປັນປົກກະຕິ, ຍົກສູງການ ແລກປ່ຽນບົດຮຽນດ້ານວຽກງານວິຊາສະເພາະກວດສອບ ໂດຍສະເພາະແມ່ນ ການກວດສອບຂະແໜງການ ຕ່າງໆ ໂດຍຈະໄດ້ຈັດຕັ້ງການຝຶກອົບຮົມ, ​ສໍາມະນາ ແລະ ອື່ນໆ.


ບົນພື້ນຖານຂໍ້ຕົກລົງວ່າດວ້ຍການຮ່ວມມືທີ່ໄດ້ລົງນາມຮ່ວມກັນ, ທັງສອງຝ່າຍຈະເອົາໃຈໃສ່ຈັດຕັ້ງ ຜັນຂະຫຍາຍບັນດາເນື້ອໃນຈິດໃຈ ທີ່ໄດ້ຕົກລົງເປັນເອກະ ພາບກັນ ໃຫ້ສຳເລັດເປັນຮູບປະທຳ. ໃນໄລຍະຂອງການຢ້ຽມຢາມ, ຄະນະຜູ້ແທນຂອງອົງການກວດສອບແຫ່ງລັດ ສປປ ລາວ ໄດ້ຖືໂອກາດ ເຂົ້າຢ້ຽມຂ່ຳນັບທ່ານ ຮອງປະທານສະພາ ດູມາ ເພື່ອແຈ້ງຈຸດປະສົງຂອງການ ມາຢ້ຽມຢາມ ໃນຄັ້ງນີ້. ພ້ອມນັ້ນ ທ່ານຮອງປະທານສະພາດູມາ ກໍ່ໄດ້ຕີລາຄາ ສູງຕໍ່ການມາຢ້ຽມຢາມ ແລະ ເຄື່ອນໄຫວຂອງ ຄະນະຜູ້ແທນ ອົງການກວດສອບແຫ່ງລັດ ສປປ ລາວ ໂດຍໄດ້ແລກປ່ຽນຄຳຄິດ ຄຳເຫັນກ່ຽວກັບມາດ ຕະການທາງວິໄນຕໍ່ ຫົວໜ່ວຍງົບປະມານທີ່ລະເມີດລະບຽບກົດໝາຍ ແລະ ອື່ນໆດ້ວຍການຮັບຜິດຊອບທາງດ້ານການເມືອງ.ໃນຕອນບ່າຍຂອງວັນ ທີ 12 ມິຖຸນາ 2013 ທ່ານປະທານອົງການກວດສອບແຫ່ງລັດ ພ້ອມດ້ວຍ ຄະນະກໍ່ໄດ້ເດີນທາງກັບຄືນນະຄອນຫຼວງ ວຽງຈັນດ້ວຍຄວາມສະຫວັດດີພາບ.

 


ຄົ້ນຫາ

Login Form

Month