ໃນຕອນເຊົ້າຂອງວັນທີ 12 ພະຈິກ 2024 ທີ່ ອົງການກວດສອບແຫ່ງລັດ, ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ, ປະທານອົງການກວດສອບແຫ່ງລັດ ສປປ ລາວ ໄດ້ໃຫ້ກຽດຕອນຮັບການເດີນທາງມາຢ້ຽມຢາມຂອງ ທ່ານ L’ubomir Andrassy, ປະທານອົງຫການກວດສອບແຫ່ງລັດ ສ. ສະໂລວັກ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວ ຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 11-14 ພະຈິກ 2024.
ໃນໂອກາດດັ່ງກ່າວ, ສະຫາຍ ວຽງທະວີສອນ ເທບພະຈັນ, ໄດ້ສະແດງຄວາມຍິນດີຕ້ອນຮັບອັນອົບອຸ່ນ ທ່ານ L’ubomir Andrassy ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍ່ຄືສອງອົງການກວດສອບແຫ່ງລັດ, ພ້ອມດຽວກັນນັ້ນ, ທ່ານ ວຽງທະວີສອນ ຍ້ອງຍໍຊົມເຊີຍ ແລະ ຕີລາຄາສູງ ຕໍ່ໝາກຜົນຂອງການຮ່ວມມືລະຫວ່າງສອງອົງການກວດສອບແຫ່ງລັດ ໃນໄລຍະປີຜ່ານມາເປັນຕົ້ນໄດ້ມີການແລກປ່ຽນພົບປະຢ້ຽມຢາມການນຳຂັ້ນສູງ ລະຫວ່າງ ສອງອົງການກວດສອບແຫ່ງລັດ ທີ່ອົງການກວດສອບແຫ່ງລັດ ສ. ສະໂລວັກ ໃນປິ 2023. ເພື່ອສືບຕໍ່ການພົວພັນຮ່ວມມືໃນຕໍ່ໜ້າ ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ຍັງໄດ້ ສະເໜີທິດທາງການຮ່ວມມືໃນຕໍ່ໜ້າຄື: 1). ສະເໜີໃຫ້ມີການພັດປ່ຽນ ພົບປະ-ຢ້ຽມຢາມ ຂອງການນຳຂັ້ນສູງສອງຝ່າຍຢ່າງເປັນປົກກະຕິ ເພື່ອແລກປ່ຽນບົດຮຽນເຊິ່ງກັນ ແລະ ກັນ; 2).ສະເໜີໃຫ້ມີໂຄງການ ຫຼື ກິດຈະກຳເປັນອັນສະເພາະ ໃນການສ້າງຄວາມເຂັ້ມແຂງໃຫ້ວຽກງານກວດສອບໃຫ້ແກ່ອົງການກວດສອບແຫ່ງລັດ ໃນຫົວຂໍ້ທີ່ສອງຝ່າຍມີຄວາມສົນໃຈຮ່ວມກັນເປັນຕົ້ນ: ການມີສ່ວນຮ່ວມໃນການພິຈາລະນາ ແຜນງົບປະມານແຫ່ງລັດ ປະຈໍາປີ, ການຄົ້ນຄວ້າເນື້ອບົດບັນທຶກຄວາມເຂົ້າໃນການຮ່ວມມືສອງຝ່າຍ.
ຮູບພາບ ແລະ ຂ່າວສານໂດຍ: ພະແນກເຕັກໂນໂລຊີ ແລະ ຂໍ້ມູນຂ່າວສານ ອົງການກວດສອບແຫ່ງລັດ
