ໃນວັນທີ 19 ຕຸລາ 2024 ສະຫາຍ ວຽງທະວີສອນ ເທບພະຈັນ ກຳມະການສຳຮອງສູນກາງພັກປະທານອົງການໄດ້ຕ້ອນຮັບຄະນະຜູ້ແທນຂັ້ນສູງອົງການກວດສອບແຫ່ງລັດ ສສ ຫວຽດນາມ ນຳໂດຍ ສະຫາຍ ໂງ ວັນຕວັນ, ກໍາມະການສູນກາງພັກກອມມູນິດຫວຽດນາມ, ປະທານອົງການກວດສອບແຫ່ງລັດ ສສ ຫວຽດນາມ ທີ່ໄດ້ມາພົບປະຢ້ຽມຢາມ ແລະ ແລກປ່ຽນບົດຮຽນໃຫ້ແກ່ພະນັກງານອົງການກວດສອບແຫ່ງລັດ ສປປ ລາວ ທີ່ອົງການກວດສອບແຫ່ງລັດ ສປປ ລາວ, ເຊິ່ງມີຕາງໜ້າສະຖານເອກອັກຄະລັດຖະທູດ ສສ ຫວຽດນາມ ປະຈໍາ ສປປ ລາວ ແລະ ຕາງໜ້າຈາກຄະນະກຳມາທິການຮ່ວມມືລາວ-ຫຽດນາມ ເຂົ້າຮ່ວມພິທີດັ່ງກ່າວ.
ໃນການພົບປະກັນ ໃນຄັ້ງນີ້ ທັງສອງຝ່າຍໄດ້ແຈ້ງກ່ຽວກັບສະພາບການພັດທະນາເສດຖະກິດ-ສັງຄົມ ແລະ ເຄື່ອນໄຫວທີ່ພົ້ນເດັ່ນຂອງວຽກງານການກວດສອບ ພ້ອມທັງທົບທວນຜົນສໍາເລັດ ແລະ ທິດທາງການຮ່ວມມືໃນຕໍ່ໜ້າ ເຊິ່ງໄດ້ແນ່ໃສ່ ສືບຕໍ່ແລກປ່ຽນການຢ້ຽມຢາມພົບປະສອງຝ່າຍໃນລະດັບການນໍາຂັ້ນສູງ ຢ່າງເປັນປົກກະຕິ, ການຊຸກຍູ້ໃຫ້ມີຂະຫຍາຍການຮ່ວມມື ລະຫວ່າງ ອົງການກວດສອບປະຈຳພາກ ຂອງ ສປປ ລາວ ແລະ ອົງການກວດສອບປະຈຳເຂດ ສສ ຫວຽດນາມ, ການແລກປ່ຽນບົດຮຽນວິຊາການ ເຊິ່ງກັນ ແລະ ກັນ ຢ່າງເປັນປົກກະຕິ; ໃຫ້ການສະໜັບສະໜູນໂຄງການຫ້ອງຫັນເປັນທັນສະໄໝ (E-Office) ແລະ ອື່ນໆ; ຈະສືບຕໍ່ຮ່ວມມືຮອບດ້ານກັບ ອົງການກວດສອບແຫ່ງລັດ ສສ ຫວຽດນາມ ໃນຕໍໍ່ໜ້າ.
ພ້ອມດຽວກັນນີ້, ຍັງໄດ້ຈັດກອງປະຊຸມແລກປ່ຽນບົດຮຽນ ໃນຫົວຂໍ້: ການບໍລິຫານວຽກງານອົງການກວດສອບປະຈຳພາກ ແລະ ການຕິດຕາມແກ້ໄຂຄຳແນະນຳກວດສອບ ຢູ່ທີ່ອົງການກວດສອບແຫ່ງລັດ ໂດຍມີພະນັກງານອົງການກວດສອບແຫ່ງລັດ, ອົງການກວດສອບປະຈຳພາກກາງ 1 ແລະ ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ເຂົ້າຮ່ວມຢ່າງພ້ອມພຽງ, ເຊິ່ງຫົວຂໍ້ດັ່ງກ່າວ ເປັນຫົວຂໍ້ທີ່ມີຄຳຄັນໃນການ ພັດທະນາ ແລະ ບໍລິຫານວຽກງານຂອງ ອົງການກວດສອບແຫ່ງລັດ ກໍ່ຄືອົງການກວດສອບປະຈຳພາກ ເພື່ອໃຫ້ມີຄວາມເຂັ້ມແຂງ ດ້ານວຽກງານກວດສອບ ໃນການຊຸກຍູ້ບັນດາຂົງເຂດ ທີ່ນຳໃຊ້ງົບປະມານແຫ່ງລັດ ສາມາດປັບປຸງແກ້ໄຂຄຳແນະນຳກວດສອບ ເພື່ອເຮັດໃຫ້ການກວດສອບມີປະສິດທິພາບ ປະສິດທິຜົນ ແລະ ປະຕິບັດຕາມລະບຽບກົົດໝາຍທີ່ກຳນົດໄວ້.
ໃນຕອນທ້າຍ, ສະຫາຍ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ໄດ້ສະແດງຄວາມຂອບໃຈ ສະຫາຍ ໂງ ວັນ ຕວັນ ປະທານອົງການກວດສອບແຫ່ງລັດ ສສ ຫວຽດນາມ ທີ່ໄດ້ຊ່ວຍເຫຼືອອົງການກວດສອບແຫ່ງລັດ ຕະຫຼອດມາ ເປັນຕົ້ນ ການຈັດຝຶກອົບຮົມໂດຍຫຼາຍຮູບແບບ ແລະ ແລກປ່ຽນບົດຮຽນ ຂໍ້ມູນຂ່າວສານເຊິ່ງກັນ ແລະ ກັນ, ພ້ອມນັ້ນ ໄດ້ອວຍພອນໃຫ້ ສະຫາຍ ພ້ອມດ້ວຍຄະນະຜູ້ແທນ ຈົ່ງປະຕິບັດໜ້າທີ່ເຄື່ອນໄຫວ ຢູ່ ສປປ ລາວ ດ້ວຍຜົນສຳເລັດອັນຈົບງາມ.
ຮູບພາບ ແລະ ຂ່າວສານໂດຍ: ພະແນກເຕັກໂນໂລຊີ ແລະ ຂໍ້ມູນຂ່າວສານ ອົງການກວດສອບແຫ່ງລັດ
