ໃນວັນທີ 11 ຫາ 15 ພະຈິກ 2025, ຄະນະຜູ້ແທນຂອງອົງການກວດສອບແຫ່ງລັດ ສປປ ລາວ ຊຶ່ງນໍາໂດຍ ທ່ານ ວຽງທະວີສອນ ເທບພະຈັນ ກໍາມະການສໍາຮອງສູນກາງພັກ, ປະທານອົງການກວດສອບແຫ່ງລັດ ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມສຸດຍອດຄັ້ງທີ 08 ຂອງສະຖາບັນກວດສອບສູງສຸດບັນດາປະເທດອາຊີຕາເວັນອອກສ່ຽງໃຕ້ (ອາຊຽນຊາຍ) (The 8th ASEANSAI Summit) ທີ່ ປະເທດສິງກະໂປ. ໃນກອງປະຊຸມຄັ້ງນີ້ມີຜູ້ແທນຂັ້ນສູງ ຂອງ 10 ສະຖາບັນກວດສອບສູງສຸດ ທີ່ເປັນສະມາຊິກຂອງອາຊຽນຊາຍ ໂດຍໃຫ້ກຽດເປັນປະທານຂອງ ທ່ານ ກາມາລຽວເອ ຄໍໂດບາ (Gamaliel A. Cordoba), ປະທານອາຊຽນຊາຍ (ປະທານສະຖາບັນກວດສອບສູງສຸດຟີລິບປິນ) ໃນນາມ ປະທານ ອາຊຽນຊາຍ ແລະ ໃຫ້ກຽດຂື້ນກ່າວຕ້ອນຮັບ ໂດຍ ທ່ານ ໂງ ເວຈົງ (Ng Wai Choong) ຮອງປະທານອາຊຽນຊາຍ, ປະທານສະຖາບັນກວດສອບສິງກະໂປ.
ກອງປະຊຸມສຸດຍອດອາຊຽນຊາຍ ແມ່ນກອງປະຊຸມ ທີ່ຈັດຂຶ້ນທຸກໆ 2 ປີ ເຊິ່ງກອງປະຊຸມຄັ້ງນີ້ໄດ້ມີການຄົ້ນຄວ້າປຶກສາຫາລື ແລະ ຕົກລົງຮັບຮອງບັນຫາຕ່າງໆທີ່ມີຄວາມສໍາຄັນເພື່ອສ້າງຄວາມເຂັ້ມແຂງໃຫ້ແກ່ການເຄື່ອນໄຫວວຽກງານຕ່າງໆຂອງສະຖາບັນກວດສອບສູງສຸດບັນດາປະເທດອາຊີຕາເວັນອອກສ່ຽງໃຕ້ ຫຼື ອາຊຽນຊາຍ ດັ່ງນີ້:
1. ຮ່າງແຜນຍຸດທະສາດ ອາຊຽນຊາຍ ປະຈຳສົກປີ 2026-2029 (Finalization of the ASEANSAI Strategic Plan 2026-2029) ຊຶ່ງປະກອບມີ 4 ເປົ້າໝາຍຍຸດທະສາດ ແລະ 8 ຈຸດປະສົງຍຸດທະສາດ;
2. ການປັບປຸງລະບຽບ ແລະ ຂັ້ນຕອນການປະຕິບັດຂອງ ອາຊຽນຊາຍ (Finalization of the revised ASEANSAI Rules and Procedures) ຊຶ່ງການປັບປຸງລະບຽບ ແລະ ຂັ້ນຕອນ ປະຕິບັດຂອງອາຊຽນຊາຍຄັ້ງທີ 5 ມີ 4 ຈຸດໃຫຍ່ ທີ່ໄດ້ປັບປຸງ;
3. ການສະເໜີຂອບວຽກຂອງຄະນະກຳມະການຝຶກອົບຮົມ (Finalization of the Training Committee Framework) ຊຶ່ງປະກອບມີ 3 ເອກະສານຄື: ASEANSAI Competency Framework), ASEANSAI Learning and development Framework and ASEANSAI Coaching and Mentoring Strategies);
4. ການສະເໜີກ່ຽວກັບແຜນວຽກ ປະຈຳປີ 2026-2027 ຂອງບັນດາຄະນະກຳມະການຕ່າງໆ ປະກອບມີຄະນະຄື: ຄະນະກຳມະການບໍລິຫານ; ຄະນະກຳມະການແຜນຍຸດທະສາດ; ຄະນະກຳມະການລະບຽບ ແລະ ຂັ້ນຕອນປະຕິບັດ; ຄະນະກຳມະການແລກປ່ຽນຄວາມຮູ້ ແລະ ຄະນະກຳມະການຝຶກອົບຮົມ;
5. ຮັບຮອງວາລະກອງປະຊຸມສຸດຍອດອາຊຽນຊາຍຄັ້ງທີ 8 (Agenda 8th ASEANSAI Summit);
6. ການສະເໜີແຕ່ງຕັ້ງ ປະທານບັນດາຄະນະກຳມະການຂອງອາຊຽນຊາຍ ປະຈຳສົກປີ 2026-2027, ເອກະສານລາຍງານການເງິນຂອງອາຊຽນຊາຍ ປະຈຳປີ 2024-2025, ແຜນງົບປະມານຂອງອາຊຽນຊາຍປະຈຳປີ 2026-2027, ຜູ້ກວດສອບຂອງອາຊຽນຊາຍ ແລະ ບັນຫາອື່ນໆ, ກອງປະຊຸມເຫັນດີເປັນເອກະພາບໃຫ້ບັນດາປະເທດສະມາຊິກ ທີ່ດຳລົງຕຳແໜ່ງເປັນປະທານຂອງແຕ່ລະຄະນະກຳມະການໃນປະຈຸບັນ ສືບຕໍ່ເປັນປະທານ ປະຈຳສົກປີ 2026-2027 ຄື:
SAI Singapore ສືບຕໍ່ເປັນປະທານຄະນະກຳມະການລະບຽບ ແລະ ຂັ້ນຕອນການປະຕິບັດ (RPC);
SAI Vietnam ສືບຕໍ່ເປັນປະທານ ຄະນະກຳມະການແຜນຍຸດທະສາດ (SPC);
SAI Malaysia ສືບຕໍ່ເປັນປະທານຄະນະກຳມະການແລກປ່ຽນຄວາມຮູ້ (KSC);
SAI Philippines ສືບຕໍ່ເປັນປະທານຄະນະກຳມະການຝຶກອົບຮົມ (TC).
ໃນກອງປະຊຸມສຸດຍອດຄັ້ງທີ 8 ຂອງສະຖາບັນກວດສອບສູງສຸດບັນດາປະເທດອາຊີຕາເວັນອອກສ່ຽງໃຕ້ ຫຼື ອາຊຽນຊາຍໃນຄັ້ງນີ້, ແມ່ນບົນພື້ນຖານ, ຫຼັກການ, ລະບຽບ ແລະ ຂັ້ນຕອນການຈັດຕັ້ງປະຕິບັດວຽກງານ ທັງສອດຄ່ອງກັບສະພາບແວດລ້ອມໃນປະຈຸບັນ ແລະ ອານາຄົດອັນໃກ້ຂອງວຽກງານກວດສອບໃນພາກພື້ນອາຊີຕາເວັນອອກສ່ຽງໃຕ້ ເຊິ່ງບັນດາຄະນະຜູ້ແທນຂັ້ນສູງຂອງອົງການກວດສອບສູງສຸດຂອງ 10 ປະເທດ ແມ່ນໄດ້ຕີລາຄາສູງຕໍ່ການເຂົ້າຮ່ວມກອງປະຊຸມ ສຸດຍອດອາຊຽນຊາຍ ຄັ້ງທີ 8 ທີ່ໄດ້ຕົກລົງຮັບຮອງເອົາບັນຫາສໍາຄັນຕ່າງໆ ທີ່ຈະເປັນທິດທາງແຜນການໃນຕໍ່ໜ້າ ສໍາລັບປີ 2026-2027 ແລະ ເປັນການຮັບປະກັນຄວາມເປັນເອກະພາບພາຍໃນສະຫະພັນສະຖາບັນກວດສອບສູງສຸດຂອງບັນດາປະເທດອາຊີຕາເວັນອອກສ່ຽງໃຕ້ ໃຫ້ມີສະຖຽນລະພາບ ແລະ ນັບມື້ນັບເຂັ້ມແຂງຂຶ້ນ.
ໃນໂອກາດທີ່ມີຄວາມໝາຍຄວາມສຳຄັນ ທີ່ຄະນະຜູ້ແທນຂອງອົງການກວດສອບແຫ່ງລັດ ສປປ ລາວ ເຂົ້າຮ່ວມກອງປະຊຸມສຸດຍອດຄັ້ງທີ 08 ຂອງສະຖາບັນກວດສອບສູງສຸດບັນດາປະເທດອາຊີຕາເວັນອອກສ່ຽງໃຕ້ (ອາຊຽນຊາຍ)(The 8th ASEANSAI Summit) ທີ່ ປະເທດສິງກະໂປ ຄັ້ງນີ, ສປປ ລາວ ໃນນາມສະມາຊິກ ຍັງໄດ້ປະກອບຄໍາເຫັນໃນແຕ່ລະບັນຫາ ທີ່ເຫັນວ່າມີຄວາມສໍາຄັນຢ່າງກົງໄປກົງມາ ເພື່ອປະກອບສ່ວນປັບປຸງແບບວິທີການເຮັດວຽກ ແລະ ໂຄງປະກອບການຈັດຕັ້ງຂອງອາຊຽນຊາຍໃຫ້ມີຄວາມອຸດົມສົມບູນຂຶ້ນເທື່ອລະກ້າວ. ສໍາລັບອົງການກວດສອບແຫ່ງລັດ ສປປ ລາວ ໄດ້ຕັ້ງໜ້າປະກອບສ່ວນໃນຫຼາຍດ້ານ ເປັນຕົ້ນ: ການເປັນເຈົ້າພາບຈັດກອງປະຊຸມສຸດຍອດອາຊຽນຊາຍ ຄັ້ງທີ 4 ພ້ອມເປັນປະທານອາຊຽນຊາຍໃນສົກປີ 2017-2019 ແລະ ເປັນເຈົ້າພາບຈັດ ແລະ ເຂົ້າຮ່ວມບັນດາກອງປະຊຸມຝຶກອົບຮົມ, ສໍາມະນາແລກປ່ຽນຄວາມຮູ້ ແລະ ອື່ນໆ ເພື່ອຍົກສູງພາລະບົດບາດຂອງອົງການກວດສອບແຫ່ງລັດ ໃນເວທີສາກົນກໍ່ຄືການສ້າງຂີດຄວາມສາມາດໃຫ້ແກ່ບັນດາພະນັກງານອົງການກວດສອບແຫ່ງລັດ ສປປ ລາວ ໃຫ້ນັບມື້ນັບເຂັ້ມແຂງຂຶ້ນເລື້ອຍໆ.
ໄປພ້ອມໆກັບການດຳເເນີນໃນກອງປະຊຸມສຸດຍອດຄັ້ງທີ 8 ຂອງສະຖາບັນກວດສອບສູງສຸດບັນດາປະເທດອາຊີຕາເວັນອອກສ່ຽງໃຕ້ ຫຼື ອາຊຽນຊາຍໃນຄັ້ງນີ້ ຄະນະຜູ້ແທນ ຍັງໄດ້ເຂົ້າຮ່ວມການຝຶກອົບຮົມແລກປ່ຽນບົດຮຽນກ່ຽວກັບຜູ້ນໍາໄວໜຸ່ມ ພາຍໃຕ້ຫົວຂໍ້ “ນະວັດຕະກໍາໃໝ່ໃນການກວດສອບຂະແໜງການສາທາລະນະ” ແລະ ຫົວຂໍ້ “ບູລິມະສິດທີ່ເຮົາຈະສຸມໃສ່ຂອງແຕ່ລະສະຖາບັນກວດສອບ”.
ຮູບພາບ ແລະ ຂ່າວສານໂດຍ: ກົມຮ່ວມມືສາກົນ ອົງການກວດສອບແຫ່ງລັດ
