ພິທີເປີດຊຸດເຝິກອົບຮົມນັກກວດສອບແຫ່ງລັດຂັ້ນ 2 ຊຸດທີ 1 ໃຫ້ຜູ້ຄົບເງື່ອນໄຂຕາມມາດຕະຖານ ແລະ ໄດ້ຜ່ານຂະບວນການປະເມີນຜູ້ເຂົ້າຮ່ວມເຝິກອົບຮົມຕາມຫຼັກສູດນັກກວດສອບແຫ່ງລັດ ໃນວັນທີ 10 ພະຈິກ 2025 ທີ່ອົງການກວດສອບປະຈຳພາກກາງ 1 ມີທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ພ້ອມດ້ວຍຄູເຝິກ ສຳມະນາກອນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ວຽງທະວີສອນ ເທບພະຈັນ ກ່າວວ່າ ການເຝິກອົບຮົມຄັ້ງນີ້ມີຄວາມສຳຄັນຫຼາຍຕໍ່ການພັດທະນາວຽກງານຊັບພະຍາກອນມະນຸດ ພະນັກງານ-ລັດຖະກອນ ອົງການກວດສອບແຫ່ງລັດໂດຍສະເພາະແມ່ນວຽກງານວິຊາສະເພາະການກວດສອບແນໃສ່ຍົກສູງຂີດຄວາມສາມາດດ້ານການກວດສອບໃນແຕ່ລະຂະແໜງການ ພ້ອມທັງສ້າງໃຫ້ໄດ້ນັກກວດສອບແຫ່ງລັດ ຂັ້ນ 2 ຊຸດ 1 ໃຫ້ມີຄວາມໜັກແໜ້ນທາງດ້ານຄວາມຮູ້ ຄວາມສາມາດ ທັກສະ ຄວາມຊຳນານງານ ແລະ ກາຍເປັນມືອາຊີບຂຶ້ນເທື່ອລະກ້າວ ເພື່ອສະໜອງໃຫ້ແກ່ຄວາມຮຽກຮ້ອງຕ້ອງການໜ້າທີ່ການເມືອງໃນໄລຍະໃໝ່ ທັງຍົກສູງປະສິດທິພາບ ປະສິດທິຜົນດ້ານວຽກງານກວດສອບສ້າງຄວາມໄວ້ວາງໃຈ ແລະ ໃຫ້ເປັນທີ່ເຊື່ອໜັ້ນຂອງປະຊາຊົນ.
ສຳມະນາກອນທີ່ເຂົ້າຮ່ວມເຝິກຄັ້ງນນີ້ມີ 20 ຍິງ 5 ທ່ານທີ່ຜ່ານມາດຖານ ເງື່ອນໄຂຕ່າງໆທີ່ກຳນົດໄວ້ ໃນນັ້ນມາຈາກອົງການກວດສອບແຫ່ງລັດ 11 ທ່ານ ອົງການກວດສອບປະຈຳພາກໃຕ້ 3 ທ່ານ ພາກເໜືອ 1 ຈຳນວນ 4 ທ່ານ ອົງການກວດສອບປະຈໍາພາກກາງ 2 ຈຳນວນ 2 ທ່ານ ໄລຍະເວລາການເຝິກອົບຮົມ 26 ວັນ ເຊິ່ງນັກເຝິກອົບຮົມຈະໄດ້ຄົ້ນຄວ້າຮ່ຳຮຽນ 2 ກຸ່ມວິຊາເປັນຕົ້ນ ຫຼັກການໃນການນໍາພາກວມເອົາ 6 ວິຊາ ແລະ ຄວາມຮູ້ກ່ຽວກັບວຽກງານການກວດສອບແຕ່ລະປະເພດ ກວມເອົາ 6 ວິຊາ ຕາມຫຼັກສູດເຝິກອົບຮົມ ສຳລັບວິທະຍາກອນທີ່ຂຶ້ນບັນຍາຍມາຈາກບັນດາກົມວິຊາສະເພາະທີ່ມີປະສົບການ ແລະ ມີບົດຮຽນຕໍ່ກັບໜ້າວຽກຕົວຈິງຂອງອົງການກວດສອບແຫ່ງລັດ.
ຮູບພາບ ແລະ ຂ່າວສານໂດຍ: ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ
