ໃນຕອນເຊົ້າຂອງວັນທີ 17 ພະຈິກ 2025 ທີ່ ອົງການກວດສອບແຫ່ງລັດ, ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ ສປປ ລາວ ໄດ້ໃຫ້ກຽດຕ້ອນຮັບ ທ່ານ ຄິມ ຊູນ ຊິກ (Kim Soon Sik), ຫົວໜ້າສະຖາບັນຝຶກອົບຮົມກວດສອບ ແລະ ກວດກາ ສ. ເກົາຫຼີ ພ້ອມຄະນະ ໄດ້ເດີນທາງມາເຄື່ອນໄຫວພົບປະຢ້ຽມຢາມ ແລະ ເຮັດວຽກ ກັບ ອົງການກວດສອບແຫ່ງລັດ ສປປ ລາວ ໃນລະຫວ່າງວັນທີ 16-19 ພະຈິກ 2025 ເພື່ອປຶກສາຫາລືແລກປ່ຽນບົດຮຽນຕ່າງໆກ່ຽວກັບການຝຶກອົບຮົມວຽກງານກວດສອບ ແລະ ວຽກປິ່້ນອ້ອມອື່ນໆ.
ໃນໂອກາດດັ່ງກ່າວ, ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ, ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ທ່ານ ຄິມ ຊູນ ຊິກ (Kim Soon Sik) ພ້ອມດ້ວຍຄະນະ ທີ່ໄດ້ເດີນທາງມາພົບປະຢ້ຽມຢາມ ແລະ ເຮັດວຽກ ຢູ່ ອົງການກວດສອບແຫ່ງລັດ ສປປ ລາວ ຄັ້ງນີ້, ເຊິ່ງຈຸດປະສົງ ຂອງການເດີນທາງມາຢ້ຽມຢາມໃນຄັ້ງນີ້, ຈຸດປະສົງເພື່ອເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍ່ຄືສອງອົງການກວດສອບແຫ່ງລັດ ສປປ ລາວ ກັບ ສຳນັກງານກວດສອບ ແລະ ກວດກາ ສ. ເກົາຫຼີ ກໍ່ຄືສະຖາບັນຝຶກອົບຮົມກວດສອບ ແລະ ກວດກາ ສ. ເກົາຫຼີ ແລະ ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບແຫ່ງລັດ ສປປ ລາວ ຈະໄດ້ຈັດຝຶກອົບຮົມ ແລະ ແລກປ່ຽນບົດຮຽນ ເຊິ່ງກັນ ແລະ ກັນ ໃນ 03 ຫົວຂໍ້ຄື:1) ການຫັນເປັນດີຈີຕ໋ອນເຂົ້າໃນການກວດສອບ; 2)ສະພາບລວມ ຂອງ ສໍານັກງານກວດສອບ ແລະ ກວດກາ ສ. ເກົາຫຼີ ແລະ ສະພາບລວມຂອງສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ສປປ ລາວ.
ເພື່ອສືບຕໍ່ການພົວພັນຮ່ວມມືໃນຕໍ່ໜ້າ ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ ຍັງໄດ້ ສະເໜີບາງບັນຫາ ໃນການຮ່ວມມື ສະຫວ່າງ ສອງອົງການກວດສອບແຫ່ງລັດ ໃນຕໍ່ໜ້າ ເປັນຕົ້ນແມ່ນ: 1)ສະເໜີໃຫ້ມີການພັດປ່ຽນ ພົບປະ-ຢ້ຽມຢາມ ຂອງການນໍາຂັ້ນສູງ ລະຫວ່າງ ສອງຝ່າຍຢ່າງເປັນປົກກະຕິ ເພື່ອແລກປ່ຽນບົດຮຽນເຊິ່ງກັນ ແລະ ກັນ; 2) ສະເໜີໃຫ້ມີໂຄງການ ຫຼື ກິດຈະກໍາເປັນອັນສະເພາະ ໃນການສ້າງຄວາມເຂັ້ມແຂງໃຫ້ວຽກງານກວດສອບໃຫ້ແກ່ອົງການກວດສອບແຫ່ງລັດ ແລະ ບັນຫາການສ້າງຄວາມເຂັ້ມແຂງໃຫ້ວຽກງານກວດສອບ ທີ່ສອງຝ່າຍມີຄວາມສົນໃຈຮ່ວມກັນ.
ພາຍຫຼັງຈາກສຳເລັດ ການພົບປະ ທັງສອງຝ່າຍ ໄດ້ມີກອງປະຊຸມແລກປ່ຽນບົດຮຽນວິຊາການ ກັບ ອົງການກວດສອບແຫ່ງລັດ ໃນຫົວຂໍ້: ການຫັນເປັນດີຈີຕ໋ອນເຂົ້າໃນການກວດສອບ (Digital Transformation in Audit). ເຊິ່ງພະນັກງານອົງການກວດສອບແຫ່ງລັດ ເຂົ້າຮ່ວມຢ່າງພ້ອມພຽງ ແລະ ໃນວັນທີ ໃນວັນທີ 18 ພະຈິກ 2025 ຄະນະຊ່ຽວຊານ ຈາກສະຖາບັນຝຶກອົບຮົມວຽກງານກວດສອບ ແລະ ກວດກາ ສ. ເກົາຫຼີ ໄດ້ເດີນທາງໄປຢ້ຽມຢາມ ແລະ ແລກປ່ຽນບົດຮຽນ ກັບ ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ໃນຫົວຂໍ້: ສະພາບລວມຂອງ ສໍານັກງານກວດສອບ ແລະ ກວດກາ ສ. ເກົາຫຼີ (Structure of BAI’s Auditor Training Program) ແລະ ສະພາບລວມຂອງສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ສປປ ລາວ ເຊິ່ງເປັນຫົວຂໍ້ທີ່ສຳຄັນທີ່ສອງສະຖາບັນຈະໄດ້ແລກປ່ຽນດ້ານຫຼັກສູດການຮຽນ-ການສອນຮ່ວມກັນ ເພື່ອປັບປຸງຍົກສູງສອງສະຖາບັນຝຶກອົບຮົມ ລາວ ແລະ ເກົາຫຼີ ໃຫ້ມີຄວາມເຂັ້ມຂຶ້ນເທື່ອລະກ້າວ.
ໃນໂອກາດທີ່ມີຄວາມໝາຍຄວາມສຳຄັນດັ່ງກ່າວ ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ ສປປ ລາວ ໄດ້ກ່າວຍ້ອງຍໍຊົມເຊີຍ ແລະ ຕີລາຄາສູງ ຕໍ່ໝາກຜົນຂອງການຮ່ວມມື ລະຫວ່າງ ສອງອົງການກວດສອບແຫ່ງລັດ ໃນໄລຍະປີຜ່ານມາ ເປັນຕົ້ນໄດ້ມີການແລກປ່ຽນບົດຮຽນ ລະຫວ່າງ ສອງອົງການກວດສອບແຫ່ງລັດ ກັບ ສຳນັກງານກວດສອບ ແລະ ກວດກາ ສ. ເກົາຫຼີ ແລະ ການຈັດຝຶກອົບຮົມໃຫ້ພະນັກງານອົງການກວດສອບແຫ່ງລັດ, ຊຶ່ງໝາກຜົນດັ່ງກ່າວໄດ້ເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ, ທັງເປັນການສ້າງຄວາມເຂັ້ມແຂງ ໃຫ້ແກ່ວຽກງານກວດສອບແຫ່ງລັດ ສປປ ລາວ ໄດ້ເປັນຢ່າງດີ.
ຮູບພາບ ແລະ ຂ່າວສານໂດຍ: ຫ້ອງການ ອົງການກວດສອບແຫ່ງລັດ
