ທ່ານ ວຽງທະວີສອນ ເທບພະຈັນ ປະທານ ອົງການກວດສອບແຫ່ງລັດ ໄດ້ລາຍງານການຈັດຕັ້ງປະຕິບັແຜນການ ເຄື່ອນໄຫວວຽກງານ 5ປີ (2021-2025) ປະຈໍາປີ 2025, ຜົນການກວດສອບ ປະຈໍາປີ 2024 ແລະ ແຜນການເຄື່ອນໄຫວ 5 ປີ (2026-2030), ປະຈໍາປີ 2026 ຂອງອົງການກວດສອບແຫ່ງລັດ ຕໍ່ກອງປະຊຸມ ສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ IX ໃນວັນທີ 14 ພະຈິກ 2025 ພາຍໃຕ້ການເປັນປະທານຂອງທ່ານ ສົມມາດ ພົນເສນາ ຮອງປະທານສະພາແຫ່ງຊາດ, ເຊິ່ງວຽກງານທີ່ພົ້ນເດັ່ນ ມີຄື:
1) ໄດ້ສຳເລັດການສ້າງຕັ້ງອົງການກວດສອບປະຈຳພາກ ຕື່ມອີກ 2 ແຫ່ງ; ເຮັດໃຫ້ມີອົງການກວດສອບພາກທັງໝົດ 5 ແຫ່ງ ເທົ່າກັບ 100% ຂອງແຜນການ. ໄດ້ປັບປຸງກົງຈັກການຈັດຕັ້ງ ໂດຍໂຮມກົມນິຕິກໍາເຂົ້າກັບສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ; ໂຮມບາງພະແນກເຂົ້າກັນຈາກ 60 ພະແນກ ມາເປັນ 54 ພະແນກ
2) ໄດ້ປັບປຸງກົດໝາຍວ່າດ້ວຍການກວດສອບແຫ່ງລັດ ໃນທ້າຍປີ 2022; ໄດ້ເຂົ້າຮ່ວມການປັບປຸງລັດຖະທໍາມະນູນ ສະບັບປີ 2025, ໄດ້ສໍາເລັດການປັບປຸງນິຕິກໍາໃຕ້ກົດໝາຍ ຈຳນວນ 27 ສະບັບ.
3) ໄດ້ຫັນພະນັກງານລົງກໍ່ສ້າງຮາກຖານ ຢູ່ອົງການກວດສອບປະຈຳ 4 ພາກ ຈໍານວນ 10 ຄົນ; ໄດ້ເອົາໃຈໃສ່ ສ້າງ ແລະ ປັບປຸງຫຼັກສູດໃນການຝຶກອົບຮົມ, ສ້າງນັກກວດສອບແຫ່ງລັດ ຂັ້ນ 1 ໄດ້ ຈໍານວນ 129 ຄົນ ລື່ນຄາດໝາຍ (ແຜນການ 30 ຄົນ);
4) ໃນໄລຍະ 5 ປີຜ່ານມາ ໄດ້ເຄື່ອນໄຫວກວດສອບໃນຂົງເຂດງົບປະມານແຫ່ງລັດ, ໂຄງການເງິນກູ້ຢືມ ແລະ ຊ່ວຍ ເຫຼືອ, ທະນາຄານແຫ່ງ ສປປ ລາວ, ທະນາຄານທຸລະກິດລັດລົງທຶນ ແລະ ວິສາຫະກິດລັດລົງທຶນ ສາມາດບັນລຸໄດ້ 600 ເປົ້າໝາຍ ເທົ່າກັບ 100% ຂອງຄາດໝາຍສູ້ຊົນທີ່ໄດ້ກໍານົດໄວ້; ພ້ອມກັນນັ້ນ ກໍ່ໄດ້ດໍາເນີນການກວດສອບຕາມການມອບໝາຍ, ຕາມການແຈ້ງການ ແລະ ຕາມການສະເໜີ ເພີ່ມຕື່ມ ຈໍານວນ 11 ເປົ້້າໝາຍ; ສາມາດເກັບກູ້ເມັດເງິນ ຈາກຜົນການກວດສອບ ຫົວໜ່ວຍງົບປະມານ ຢູ່ສູນກາງ ແລະ ທ້ອງຖີ່ນ ວິສາຫະກິດລັດລົງທຶນ ເຂົ້າງົບປະມານແຫ່ງລັດ ໄດ້ທັງໝົດ 5,031.43 ຕື້ກີບ ໃນນີ້: ເງິນລາຍຮັບທີ່ຍັງຄ້າງມອບ ໃນບັນຊີລໍຖ້າຈັດສັນ ຈໍານວນ 3,268.34 ຕື້ກີບ, ໜີ້ຕ້່ອງຮັບສວຍສາອາກອນ ຊັບສິນ, ໜີ້ຕ້ອງຮັບອື່ນໆ ຈໍານວນ 1,693.34 ຕື້ກີບ, ລາຍຮັບອື່ນໆ ຈໍານວນ 69.11 ຕື້ກີບ.
5) ໄດ້ເຄື່ອນໄຫວຮ່ວມມືກັບ ອົງການກວດສອບແຫ່ງລັດ ຂອງປະເທດເພື່ອນມິດເຊັ່ນ: ສສ ຫວຽດນາມ, ສປ ຈີນ, ອິນໂດເນເຊຍ, ມາເລເຊຍ, ຮົງກາລີ, ສ. ສະໂລວັກ, ສ. ຣັດເຊຍ, ສ ເກົາຫຼີ ແລະ ຝຣັ່ງ ໂດຍລົງເລິກ ແລະ ສຸມໃສ່ແລກປ່ຽນບົດຮຽນ ດ້ານວິຊາສະເພາະ ໃນ 03 ປະເພດການກວດສອບໃນຫົວຂໍ້ຕ່າງໆ; ນອກຈາກນັ້ນ ກໍ່ໄດ້ຝຶກອົບຮົມສ້າງຄວາມເຂັ້ມແຂງທາງດ້ານວຽກງານວິຊາສະເພາະ ມີຜູ້ເຂົ້າຮ່ວມທັງໝົດ ຈໍານວນ 615 ເທື່ອຄົນ.
ພ້ອມນີ້, ກໍ່ໄດ້ວາງທິດທາງແຜນການ ໃນ 05 ປີຕໍ່ໜ້າ ຂອງອົງການກວດສອບແຫ່ງລັດ ຈະສຸມໃສ່ຈັດຕັ້ງປະຕິບັດບັນດາໜ້າວຽກຕ່າງໆ ດັ່ງນີ້:
1) ສືບຕໍ່ປັບປຸງກົງຈັກການຈັດຕັ້ງໃຫ້ມີຄວາມໜັກແໜ້ນ, ເຂັ້ມແຂງ ຕາມທິດກະທັດຮັດ, ສົມເຫດສົມຜົນ ແລະ ແທດເໝາະກັບສະພາບຕົວຈິງ; ກໍ່ສ້າງພະນັກງານນຳພາ-ຄຸ້ມຄອງ ແລະ ພະນັກງານສືບທອດປ່ຽນແທນແຕ່ລະຕໍາແໜ່ງ ໃຫ້ມີລັກສະນະຕໍ່ເນື່ອງ ຕາມທິດຫັນເປັນໜຸ່ມ ເຮັດໃຫ້ວຽກງານກົງຈັກການຈັດຕັ້ງ ແລະ ພະນັກງານ ມີຄວາມເຂັ້ມແຂງ.
2) ສ້າງ, ປັບປຸງກົດໝາຍ ແລະ ນິຕິກໍາ ໃຫ້ເປັນລະບົບຄົບຊຸດ, ແທດເໝາະກັບສະພາບການຈັດຕັ້ງປະຕິບັດຕົວຈິງໃນແຕ່ລະໄລຍະ; ຊຶ່ງຕ້ອງໄດ້ເລັ່ງໃສ່ການປັບປຸງກົດໝາຍ ໃຫ້ສອດຄ່ອງກັບລັດຖະທຳມະນູນ (ສະບັບປັບປຸງ ປີ 2025); ສ້າງນິຕິກໍາ ກ່ຽວກັບການຊຸກຍູ້ການແກ້ໄຂຜົນການກວດສອບ, ນິຕິກໍາ ການເຂົ້າຮ່ວມພິຈາລະນາໃນການສ້າງ ແລະ ການດັດແກ້ແຜນງົບປະມານແຫ່ງລັດ, ສ້າງປຶ້ມຄູ່ມືການຮັບປະກັນຄຸນນະພາບການກວດສອບ (QA) ແລະ ການຄວບຄຸມຄຸນນະພາບການກວດສອບ (QC), ປັບປຸງປຶ້ມຄູ່ມືການກວດສອບຜົນການຈັດຕັ້ງປະຕິບັດ ແລະ ສ້າງປື້ມຄູ່ມືກວດສອບສິ່ງແວດລ້ອມ.
3) ພັດທະນາບຸກຄະລາກອນໃຫ້ມີຄຸນນະພາບ ໂດຍສຸມໃສ່ສ້າງນັກກວດສອບ ຂັ້ນ 1 ໃຫ້ໄດ້ 170 ຄົນ ແລະ ຂັ້ນ 2 ໃຫ້ໄດ້ 50 ຄົນ, ປະເມີນ ແລະ ກຽມຄວາມພ້ອມໃນການສ້າງນັກກວດສອບ ຂັ້ນ 3 ແລະ ຂັ້ນ 4.
4) ສືບຕໍ່ຍົກສູງຄຸນນະພາບການກວດສອບ ໂດຍການສ້າງແຜນການກວດສອບຢ່າງມີຈຸດສຸມ, ດໍາເນີນການກວດສອບ ຢ່າງມີຄຸນນະພາບ, ກວດສອບບັນຫາທີ່ມີຜົນກະທົບຕໍ່ງົບປະມານແຫ່ງລັດ, ບັນຫາທີ່ມີຜົນກະທົບຕໍ່ເສດຖະກິດ-ການເງິນ ຂອງປະເທດ, ໃນ 5 ປີຕໍ່ໜ້າ ສູ້ຊົນກວດສອບໃຫ້ສໍາເລັດ 620 ເປົ້າໝາຍ; ສູ້ຊົນກວດສອບ 3 ປະເພດ ໃຫ້ມີອັດຕາສ່ວນທີ່ສົມດຸນ; ກວດສອບຜົນການຈັດຕັ້ງປະຕິບັດ ໃຫ້ກວມເອົາ 40% ຂອງຈຳນວນເປົ້າໝາຍທັງໝົດ.
5) ພັດທະນາ, ນໍາໃຊ້ເຕັກໂນໂລຊີ ແລະ ນະວັດຕະກໍາໃໝ່ ເຂົ້າໃນວຽກງານກວດສອບ ໂດຍການລິເລີ່ມນໍາໃຊ້ລະບົບການເຊື່ອມຕໍ່ຂໍ້ມູນທາງດ້ານການເງິນກັບຂະແໜງການຂອງພາກລັດ, ລະບົບ E-Audit ເຂົ້າການກວດສອບ ເຮັດໃຫ້ການກວດສອບມີຄວາມວ່ອງໄວ, ຊັດເຈນ ແລະ ມີປະສິດທິພາບ, ປະຢັດທັງເວລາ ແລະ ງົບປະມານ.
6) ສືບຕໍ່ເສີມຂະຫຍາຍການຮ່ວມມືກັບຕ່າງປະເທດ ຢ່າງມີຫຼັກການ ແລະ ເປັນເຈົ້າການຢ່າງມີປະສິດທິຜົນຫຼາຍຂຶ້ນ; ໃນນັ້ນ: ສຸມໃສ່ການຮ່ວມມືສອງຝ່າຍ ກັບ ບັນດາປະເທດເພື່ອນມິດຍຸດທະສາດ ເປັນຕົ້ນ: ສສ ຫວຽດນາມ, ສປ ຈີນ, ອາຊຽນ ແລະ ເພື່ອນມິດສາກົນອື່ນໆ.
ໃນວັນທີ 17 ພະຈິກ ໃນການຂຶ້ນຊີ້ແຈງ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ IX ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ; ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ໄດ້ຊີ້ແຈງກ່ຽວກັບກົນໄກ ແລະ ວິທີການຕ່າງໆ ໃນການຕິດຕາມ, ຊຸກຍູ້ການແກ້ໄຂຜົນການກວດສອບ ຊຶ່ງໃນນີ້ ກໍໄດ້ຊີ້ແຈງກ່ຽວກັບຂໍ້ສະເໜີຂອງສະມາຊິກສະພາແຫ່ງຊາດ ໃຫ້ມີການປັບປຸງກົດໝາຍວ່າດ້ວຍການກວດສອບແຫ່ງລັດກ່ຽວກັບການເພີ່ມພາລະບົດບາດ, ສິດຂອງອົງການກວດສອບແຫ່ງລັດໃນການແກ້ໄຂຜົນການກວດສອບໃຫ້ຈະແຈ້ງແລະເຂັ້ມງວດຂຶ້ນ.
ເຖິງວ່າ ອົງການກວດສອບແຫ່ງລັດ ບໍ່ມີໜ້າທີ່ຫຼືສິດອໍານາດໃນການແກ້ໄຂຜົນການກວດສອບໂດຍກົງ, ແຕ່ໃນໄລຍະຜ່ານມາພາຍໃຕ້ການນໍາພາ-ຊີ້ນໍາຂອງພັກ-ລັດ ອົງການກວດສອບແຫ່ງລັດ ໄດ້ເປັນເຈົ້າການໃນການຕິດຕາມ, ຊຸກຍູ້ການແກ້ໄຂຜົນການກວດສອບຢ່າງແຂງດ້ວຍຫຼາຍຮູບການເປັນຕົ້ນໄດ້ເຊີນອົງການຄຸ້ມຄອງເປົ້າໝາຍ ແລະ ເປົ້າໝາຍມາປະຊຸມເພື່ອເຜີຍແຜ່ບົດແຈ້ງຜົນການກວດສອບ; ໄດ້ອອກແຈ້ງການໃຫ້ເປົ້າໝາຍຖືກກວດສອບສົ່ງບົດລາຍງານການແກ້ໄຂຜົນການກວດສອບໃຫ້ອົງການກວດສອບແຫ່ງລັດ; ໄດ້ແຕ່ງຕັ້ງຄະນະລົງໄປຕິດຕາມຊຸກຍູ້ ແລະ ກວດຄືນຄວາມຄືບໜ້າໃນການແກ້ໄຂຢູ່ເປົ້າໝາຍຈໍານວນໜຶ່ງ. ພ້ອມນັ້ນ, ກໍໄດ້ເປັນເຈົ້າການອອກແຈ້ງການເລັ່ງທວງໃຫ້ເປົ້າໝາຍຖືກກວດສອບ ແລະ ພາກສ່ວນກ່ຽວຂ້ອງມອບເງິນຈາກຜົນການກວດສອບເຂົ້າງົບປະມານແຫ່ງລັດຊຶ່ງຈະສັງເກດເຫັນວ່າການແກ້ໄຂຜົນການກວດສອບດ້ວຍການມອບເງິນເຂົ້າງົບປະມານແຫ່ງລັດໃນໄລຍະ2 ປີຜ່ານມາຄືໃນປີ2024 ແລະ 2025 ມີຫຼາຍຂຶ້ນຖ້າທຽບໃສ່ຊຸມປີຜ່ານ.
ຂ່າວສານໂດຍ: ຫ້ອງການ ອົງການກວດສອບແຫ່ງລັັດ
