ໃນວັນທີ 18 ຕຸລາ 2024 ສະຫາຍ ວຽງທະວີສອນ ເທບພະຈັນ ກໍໍາມະການສໍາຮອງສູນກາງພັກ, ປະທານອົງການກວດສອບແຫ່ງລັດ ສປປ ລາວ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບ ສະຫາຍ ເຈີນ ແທັງ ເໝີນ ກໍາມະການກົມການເມືອງສູນກາງພັກກອມມູນິດຫວຽດນາມ ປະທານສະພາແຫ່ງຊາດ ສສ ຫວຽດນາມ ຢ່າງເປັນທາງການ ທີ່ ໂຮງແຮມຄຣາວພ່າຊາ ເນື່ອງໃນໂອກາດທີ່ທ່ານມາເຂົ້າຮ່ວມກອງປະຊຸມສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ທີ່ ສປປ ລາວ.
ໃນໂອການດັ່ງກ່າວ ສະຫາຍ ວຽງທະວີສອນ ເທບພະຈັນ ກໍໍາມະການສໍາຮອງສູນກາງພັກ, ປະທານອົງການກວດສອບແຫ່ງລັດ ສປປ ລາວ ໄດ້ຖືໂອກາດສະແດງຄວາມຂອບອົກຂອບໃຈ ມາຍັງທ່ານ ປະທານສະພາແຫ່ງຊາດ ສສ ຫວຽດນາມ ທີ່ຍາມໃດກໍ່ເປັນຫວ່ງເປັນໃຍ, ໃກ້ຊິດຕິດແທດ ແລະ ໃຫ້ການຊີ້ນໍາຕໍ່ວຽກງານກວດສອບແຫ່ງລັດສອງປະເທດ ພ້ອມທັງ ສະແດງຄວາມເຫັນອົກເຫັນໃຈຕໍ່ ພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ຮັບຜົນກະທົບຈາກ ພາຍຸ ຢາງິ ແລະ ພາຍຸຊູລິກ ທີ່ພັດເຂົ້າບັນດາແຂວງພາກເໜືອ ແລະ ພາກກາງ ຂອງປະເທດ ໃນເດືອນກັນຍາຜ່ານມາ. ພ້ອມນັ້ນ ສະຫາຍ ວຽງທະວີສອນ ເທບພະຈັນ ໄດ້ລາຍງານຜົນສຳເລັດ ໃນການຈັດຕັ້ງປະຕິບັດວຽກງານຮ່ວມມື ລະຫວ່າງ ອົງການກວດສອບແຫ່ງລັດ ລາວ-ຫວຽດນາມ ໃນໄລຍະຜ່ານມາ ທີ່ມີການຮ່ວມມືຢ່າງສະນິດແໜ້ນ ແລະ ໄດ້ຮັບໜາກຜົນທີ່ດີ ເປັນຕົ້ນ ການພົບປະຢ້ຽມຢາມສອງຝ່າຍ ຢ່າງເປັນປົກກະຕິ, ການຊຸກຍູ້ໃຫ້ມີຂະຫຍາຍການຮ່ວມມື ລະຫວ່າງ ອົງການກວດສອບປະຈຳພາກ ຂອງ ສປປ ລາວ ແລະ ອົງການກວດສອບປະຈຳເຂດ ສສ ຫວຽດນາມ, ການແລກປ່ຽນບົດຮຽນວິຊາການ ເຊິ່ງກັນ ແລະ ກັນ ຢ່າງເປັນປົກກະຕິ; ໃຫ້ການສະໜັບສະໜູນໂຄງການຫ້ອງຫັນເປັນທັນສະໄໝ (E-Office) ແລະ ອື່ນໆ; ຈະສືບຕໍ່ຮ່ວມມືຮອບດ້ານກັບ ອົງການກວດສອບແຫ່ງລັດ ສສ ຫວຽດນາມ ໃນຕໍໍ່ໜ້າ.
ສະຫາຍ ເຈີນ ແທັງ ເໝີນ ປະທານສະພາແຫ່ງຊາດ ສສ ຫວຽດນາມ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ທີ່ສອງອົງການກວດແຫ່ງລັດ ໄດ້ມີການພົວພັນຮ່ວມມືກັນ ຢ່າງສະໜິດແໜ້ນ ບົດພື້ນຖານແນວທາງຂອງພັກ ແລະ ລັດຖະບານສອງປະເທດ, ແລະ ໄດ້ຜັນຂະຫຍາຍ ທິດຊີ້ນຳ ເປັນອັນລະອຽດໃນການຈັດຕັ້ງປະຕິບັດ ບັນດາກິດຈະກຳເຂົ້າໃນການພັດທະນາ ວຽກງານຂອງສອງອົງການກວດສອບແຫ່ງລັດ ຢ່າງມີປະສິດທິພາບປະສິດທິຜົນ. ພ້ອມນັ້ນ ສະຫາຍ ຍັງໄດ້ໃຫ້ທິດຊີ້ນຳ ຕໍ່ສອງອົງການກວດສອບແຫ່ງລັດ ໃຫ້ສືບຕໍ່ການພົວພັນຮ່ວມມືຮອບດ້ານ, ລົງເລິກ ແລະ ສືບຕໍ່ສ້າງຄວາມເຂັ້ມແຂງ ທາງດ້ານວຽກງານກວດສອບແຫ່ງລັດ ໃຫ້ນັບມືພັດທະນາຂຶ້ນເທື່ອລະກ້າວ.
ໃນຕອນທ້າຍ, ສະຫາຍ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ໄດ້ສະແດງຄວາມຂອບໃຈ ຕໍ່ກັບທິດຊີ້ນຳ ຂອງ ສະຫາຍ ເຈີນ ແທັງ ເໝີນ ປະທານສະພາແຫ່ງຊາດ ສສ ຫວຽດນາມ ແລະ ຈະນຳເອົາທິດຊີ້ນຳໄປຜັນຂະຫຍາຍ ເຂົ້າໃນວຽກງານ ໃຫ້ປະກົດຜົນເປັນຈິງ, ພ້ອມນັ້ນ ໄດ້ອວຍພອນໃຫ້ ສະຫາຍ ພ້ອມດ້ວຍຄະນະຜູ້ແທນ ເຂົ້າຮ່ວມກອງປະຊຸມສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ແລະ ເຄື່ອນໄຫວຢູ່ ສປປ ລາວ ດ້ວຍຜົນສຳເລັດອັນຈົບງາມ.
ຮູບພາບ ແລະ ຂ່າວສານ ໂດຍ: ພະແນກເຕັກໂນໂລຊີ ແລະ ຂໍ້ມູນຂ່າວສານ ອົງການກວດສອບແຫ່ງລັດ
