ໃນລະຫວ່າງ ວັນທີ 15-23 ທັນວາ 2024, ຄະນະຜູ້ແທນຂອງອົງການກວດສອບແຫ່ງລັດ ສປປ ລາວ ນໍາໂດຍ ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ ປະທານອົງການກວດສອບແຫ່ງລັດ ພ້ອມຄະນະ ໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ກັບ ສະພາກວດສອບບັນຊີແຫ່ງ ສະຫະພັນຣັດເຊຍ ທີ່ນະຄອນມົດສະກູ ປະເທດ ຣັດເຊຍ ໂດຍໄດ້ຮັບການຕ້ອນຮັບຂອງ ທ່ານ ໄບລີສ ກາໄວຊົກ ປະທານສະພາກວດສອບບັນຊີແຫ່ງ ສະຫະພັນຣັດເຊຍ. ການຢ້ຽມຢາມ ແລະ ເຮັດວຽກກັບສະພາກວດສອບັນຊີແຫ່ງ ສະຫະພັນຣັດເຊຍ ຄັ້ງນີ້, ຄະນະຜູ້ແທນຈະໄດ້ເຂົ້າຮ່ວມພົບປະສອງຝ່າຍ ແລະ ຮ່ວມພິທີລົງນາມ ຂໍ້ຕົກລົງວ່າດ້ວຍການຮ່ວມມືສອງຝ່າຍຂົງເຂດວຽກງານກວດສອບແຫ່ງລັດ ສະບັບປັບປຸງ ແລະ ກອງປະຊຸມແລກປ່ຽນບົດຮຽນດ້ານວິຊາການ ບົນພື້ຖານຜັນຂະຫຍາຍຂໍ້ຕົກລົງ ວ່າດ້ວຍການຮ່ວມມື ລະຫວ່າງ ອົງການກວດສອບແຫ່ງລັດ ສປປ ລາວ ກັບສະພາກວດສອບບັນຊີແຫ່ງສະຫະພັນລັດເຊຍ.
ການພົບປະສອງຝ່າຍໃນຄັ້ງນີ້, ບໍ່ພຽງແຕ່ເປັນຂີດໝາຍໃນການສືບຕໍ່ ເສີມຂະຫຍາຍສາຍພົວພັນຮ່ວມມື ພາຍໃຕ້ຂອບການຮ່ວມມືສອງຝ່າຍ, ຫາກຍັງເປັນການສ້າງຊຸກຍູ້ຊ່ວຍເຫຼືອ ແລະ ສະໜັບສະໜູນ ເຊິ່ງກັນ ແລະ ກັນ ເພື່ອພັດທະນາຂະແໜງການກວດສອບແຫ່ງລັດ ຂອງສອງປະເທດ ໃຫ້ມີຄວາມໜັກແໜ້ນເຂັ້ມແຂງ ແລະ ກ້າວໜ້າຢ່າງບໍ່ຢຸດຢັ້ງ; ພ້ອມດຽວກັນນັ້ນ, ກໍ່ເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ ກໍ່ຄືການເສີມຂະຫຍາຍສາຍພົວພັນທາງການທູດ ຄົບຮອບ 64 ປີ (07/10/1960-07/10/2024). ກອງປະຊຸມພົບປະສອງຝ່າຍຄັ້ງນີ້, ນອກຈາກຄະນະຜູ້ແທນທັງສອງຝ່າຍ ໄດ້ແຈ້ງກ່ຽວກັບສະພາບການພັດທະນາເສດຖະ ກິດ-ສັງຄົມ ແລະ ເຄື່ອນໄຫວທີ່ພົ້ນເດັ່ນ ຂອງວຽກງານການກວດສອບ ແລ້ວ, ຄະນະຜູ້ແທນສອງຝ່າຍຍັງໄດ້ແລກປ່ຽນບົດຮຽນດ້ານວິຊາການ 3 ຫົວຂໍ້ສໍາຄັນຄື: 1. ການມີສ່ວນຮ່ວມໃນການພິຈາລະນາແຜນງົບປະມານປະຈຳປີ; 2. ການກວດສອບງົບປະມານຂັ້ນທ້ອງຖິ່ນ ແລະ 3. ການພັດທະນາດ້ານບຸກຄະລາກອນຢູ່ຫ້ອງການສະພາກວດສອບບັນຊີ.
ນອກຈາກການແລກປ່ຽນບົດຮຽນ ທາງດ້ານວິຊາການແລ້ວ, ກອງປະຊຸມສອງຝ່າຍໄດ້ທົບທວນຄືນຜົນສໍາເລັດ ແລະ ທິດທາງການຮ່ວມມື ເພື່ອພັດທະນາຂະແໜງການກວດສອບແຫ່ງລັດ ຂອງສອງປະເທດ ໃຫ້ມີການເຕີບໃຫຍ່, ເຂັ້ມແຂງ ແລະ ກ້າວໜ້າຢ່າງບໍ່ຢຸດຢັ້ງ ໃນຕໍ່ໜ້າ ຄື:
- ສະເໜີໃຫ້ມີການພັດປ່ຽນ ພົບປະ-ຢ້ຽມຢາມ ຂອງການນຳຂັ້ນສູງສອງຝ່າຍຢ່າງເປັນປົກກະຕິ ເພື່ອແລກປ່ຽນບົດຮຽນເຊິ່ງກັນ ແລະ ກັນ;
- ສະເໜີລົງເລີກຊ່ວຍໃນການສ້າງບຸກຄະລາກອນ, ນັກກວດສອບ ໂດຍການແລກປ່ຽນບົດຮຽນ ໃນບັນດາຫົວຂໍ້ທີສອງຝ່າຍມີຄວາມສົນໃຈ ເປັນຕົ້ນ: ການກວດສອບລັດວິສາຫະກິດ, ການເຂົ້າເຖິງຂໍ້ມູນດ້ານການເງິນຂອງລັດຖະບານຂັ້ນສູນກາງ ແລະ ທ້ອງຖິ່ນ, ການສ້າງຄວາມເຂັ້ມແຂງໃຫ້ແກ່ພະນັກງານນັກວດສອບ ແລະ ການຫັນເປັນທັນສະໄໝ ເຂົ້າໃນວຽກງານກວດສອບ;
- ສະເໜີສ້າງເປັນໂຄງການເປັນອັນສະເພາະໃນການຮ່ວມມື ລະຫວ່າງ ສອງອົງການ ເພື່ອຊ່ວຍອົງການກວດສອບປະຈໍາພາກທີ່ສ້າງຕັ້ງຂຶ້ນໃໝ່ ຂອງ ສປປ ລາວ ໂດຍສະເພາະບົດຮຽນການກວດສອບງົບປະມານຂັ້ນທ້ອງຖິ່ນ, ການກວດສອບຜົນການຈັດຕັ້ງປະຕິບັດ.
ໃນໂອກາດທີ່ມີຄວາມໝາຍສຳຄັນດັ່ງກ່າວ, ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ ປະທານອົງການກວດອບແຫ່ງລັດ ໄດ້ສະແດງຄວາມຂອບໃຈຢ່າງຈິງໃຈມາຍັງ ສະພາກວດສອບບັນຊີແຫ່ງ ສະຫະພັນຣັດເຊຍ ກໍຄືສະພາກວດສອບປະຈຳນະຄອນເຊັນປີເຕີສະເບີກ ທີ່ໄດ້ໃຫ້ການຕ້ອນຮັບ ແລະ ແບ່ງປັນຄວາມຮູ້ໃຫ້ແກ່ອົງການກວດສອບແຫ່ງລັດ ສປປ ລາວ ຕະຫຼອດມາ; ພ້ອມທັງສືບຕໍ່ຮ່ວມມື ແລະ ຊ່ວຍເຫຼືອ ເພື່ອສ້າງຄວາມເຂັ້ມແຂງໃຫ້ແກ່ພະນັກງານ-ນັກກວດສອບຂອງອົງການກວດສອບແຫ່ງລັດ ສປປ ລາວ ໃນຕໍ່ໜ້າ. ຈາກນັ້ນ, ທ່ານ. ໄບລີສ ກາໄວຊົກ ປະທານສະພາກວດສອບບັນຊີແຫ່ງ ສະຫະພັນຣັດເຊຍ ກໍ່ໄດ້ສະແດງຄວາມຍິນດີ ແລະ ເຊື່ອໝັ້ນວ່າອົງການກວດສອບແຫ່ງລັດ ສປປ ລາວ ແລະ ສະພາກວດສອບບັນຊີແຫ່ງ ສະຫະພັນຣັດເຊຍ ຈະສືບຕໍ່ສະໜັບສະໜູນອົງການກວດສອບແຫ່ງລັດ ສປປ ລາວ ແລະ ຈະເສີມຂະຫຍາຍສາຍພົວພັນຮ່ວມມື ລະຫວ່າງ ສອງອົງການກວດສອບແຫ່ງລັດ ໃຫ້ມີຄການເຕີບໃຫຍ່ຂະຫຍາຍຕົວ ດ້ວຍບາດກ້າວທີໜັກແໜ້ນ ແລະ ເຂັ້ມແຂງຂື້ນເລື້ອຍໆ.
ຮູບພາບ ແລະ ຂ່າວສານໂດຍ: ກົມຮ່ວມມືສາກົນ ອົງການກວດສອບແຫ່ງລັດ.
