ອົງການກວດສອບແຫ່ງລັດ ໄດ້ຈັດກອງປະຊຸມສະຫລຸບວຽກງານກວດສອບ ປະຈຳປີ ຂຶ້ນໃນວັນທີ 20 ກຸມພາ 2024 ທີ່ໂຮງແຮມຮໍລິເດອິນ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ວຽງທະວີສອນ ເທບພະຈັນ ກໍາມະການສຳຮອງສູນກາງພັກ, ປະທານອົງການກວດສອບແຫ່ງລັດ, ມີບັນດາທ່ານຮອງປະທານ ອົງການກວດສອບແຫ່ງລັດ, ຄະນະນໍາ ແລະ ພະນັກງານອົງການກວດສອບປະຈໍາພາກ, ບັນດາກົມ ແລະ ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ເຂົ້າຮ່ວມ.
ກອງປະຊຸມໃນຄັ້ງນີ້ໄດ້ລາຍງານການເຄື່ອນໄຫວວຽກງານກວດສອບແຫ່ງລັດ ປະຈຳປີ 2024, ທິດທາງແຜນການເຄື່ອນໄຫວ ປີ 2025 ແລະ ລາຍງານຜົນການກວດສອບ ປະຈໍາປີ 2023 ຂອງອົງການກວດສອບແຫ່ງລັດ ແລະ ປຶກສາລືແລກປ່ຽນບົດຮຽນ 5 ບັນຫາຕິດພັນກັບວຽກງານວິຊາສະເພາະກວດສອບ ຄື: 1). ການສ້າງແຜນກວດສອບ, 2). ການກວດສອບເງິນເກີນແຜນ, 3). ການຊຸກຍູ້ ແລະ ຕິດຕາມແກ້ໄຂຜົນການກວດສອບ, 4). ການສະຫລຸບຜົນການກວດສອບ, 5). ການກະກຽມບົດລາຍງານຜົນການກວດສອບ ລະຫວ່າງ ອົງການກວດສອບປະຈໍາພາກ, ບັນດາກົມວິຊາສະເພາະ ກັບ ກົມປະເມີນຄຸນນະພາບການກວດສອບ ແລະ ເປົ້າໝາຍຖືກກວດສອບ ເພື່ອຍົກສູງຄຸນນະພາບການແກ້ໄຂຜົນການກວດສອບ.
ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ ໄດ້ລາຍງານການເຄື່ອນໄຫວວຽກງານກວດສອບແຫ່ງລັດ ປີ 2024, ທິດທາງແຜນການເຄື່ອນໄຫວປີ 2025 ແລະ ລາຍງານຜົນການກວດສອບ ປະຈໍາ 2023 ໂດຍໄດ້ຍົກໃຫ້ເຫັນວ່າ: ໃນໄລຍະ 01 ປີຜ່ານມາອົງການກວດສອບແຫ່ງລັດ ແລະ ອົງການກວດສອບປະຈໍາພາກ ໄດ້ເອົາໃຈໃສ່ປະຕິບັດວຽກງານວິຊາສະເພາະກວດສອບ ຕາມພາລະບົດບາດ, ສິດ ແລະ ໜ້າທີ່ຂອງຕົນ ທີ່ໄດ້ກໍານົດໄວ້ໃນກົດໝາຍວ່າດ້ວຍການກວດສອບແຫ່ງລັດ, ມະຕິກອງປະຊຸມສະພາແຫ່ງຊາດ, ມະຕິກອງປະຊຸມສະພາປະຊາຊົນຂັ້ນແຂວງ, ແຜນການເຄື່ອນໄຫວຽກງານປະຈໍາປີ ໄດ້ຮັບຜົນສໍາເລັດ ເປັນຢ່າງດີຄື: ໃນປີ 2023 ໄດ້ດໍາເນີນການກວດສອບເອກະສານລາຍງານການເງິນ, ຄວາມສອດຄ່ອງທາງດ້ານກົດໝາຍ ແລະ ຜົນການຈັດຕັ້ງປະຕິບັດ ຕາມແຜນ ຈໍານວນ 117 ເປົ້າໝາຍ, ມີການກວດສອບເພີ່ມຕື່ມອີກ 3 ເປົ້າໝາຍ, ລວມເປັນ 120 ເປົ້າໝາຍ ເທົ່າກັບ 102.56% ຂອງແຜນການ ໃນນັ້ນ: ກວດສອບງົບປະມານແຫ່ງລັດລັດໄດ້ 30 ເປົ້າໝາຍ, ທະນາຄາານ 10 ເປົ້າໝາຍ, ວິສາຫະກິດລັດລົງທຶນ 12 ເປົ້າໝາຍ, ໂຄງການເງິນກູ້ຢືມ ແລະ ຊ່ວຍເຫຼືອ 18 ເປົ້າໝາຍ, ອົງການກວດສອບປະຈຳພາກເໜືອ 01: 10 ເປົ້າໝາຍ, ອົງການກວດສອບປະຈໍາພາກເໜືອ 02: 10 ເປົ້າໝາຍ, ອົງການກວດສອບປະຈຳພາກກາງ 01: 12 ເປົ້າໝາຍ, ອົງການກວດສອບປະຈໍາພາກກາງ 02: 07 ເປົ້າໝາຍ, ອົງການກວດສອບປະຈໍາພາກໃຕ້ 11 ເປົ້າໝາຍ. ໄດ້ສໍາເລັດການສ້າງບົດສະຫຼຸບ ແລະ ລາຍງານການເຄື່ອນໄຫວວຽກງານປະຈໍາປີ ແລະ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ, ຜົນການກວດສອບເອກະສານລາຍງານການເງິນຂອງ ທະນາຄານແຫ່ງ ສປປ ລາວ, ທະນາຄານ, ທຸລະກິດ, ບໍລິສັດລັດລົງທຶນ ແລະ ຜົນການກວດສອບໂຄງການລົງທຶນຂອງລັດ ແລະ ພ້ອມນີ້ກໍ່ໄດ້ສະຫຼຸບລາຍງານຕໍ່ປະທານປະເທດ, ນາຍົກລັດຖະມົນຕີ, ຄະນະປະຈໍາສະພາແຫ່ງຊາດ, ກອງປະຊຸມສະພາແຫ່ງຊາດ, ຄະນະປະຈໍາສະພາປະຊາຊົນຂັ້ນແຂວງ ແລະ ກອງປະຊຸມສະພາປະຊາຊົນຂັ້ນແຂວງ.
ໃນປີ 2025 ອົງການກວດສອບແຫ່ງລັດ ຈະໄດ້ສືບຕໍ່ປະຕິບັດ ຕາມພາລະບົດບາດ, ສິດ ແລະ ໜ້າທີ່ຂອງຕົນຊຶ່ງຈະໄດ້ດໍາເນີນການກວດສອບ ຈໍານວນ 155 ເປົ້າໝາຍ, ໃນນັ້ນ: ກວດສອບອົງການຈັດຕັ້ງລັດ 28 ເປົ້າໝາຍ, ກວດສອບທະນາຄານ 15 ເປົ້າໝາຍ, ກວດສອບວິສາຫະກິດ 15 ເປົ້າໝາຍ, ກວດສອບໂຄງການ 18 ເປົ້າໝາຍ, ອົງການກວດສອບປະຈໍາພາກເໜືອ 1 ຈໍານວນ 16 ເປົ້າໝາຍ, ອົງການກວດສອບປະຈໍາພາກເໜືອ 2 ຈໍານວນ 12 ເປົ້າໝາຍ, ອົງການກວດສອບປະຈໍາພາກກາງ 1 ຈໍານວນ 18 ເປົ້າໝາຍ, ອົງການກວດສອບປະຈໍາພາກກາງ 2 ຈໍານວນ 13 ເປົ້າໝາຍ, ອົງການກວດສອບປະຈໍາພາກໃຕ້ ຈໍານວນ 20 ເປົ້າໝາຍ.
ຂ່າວສານ ແລະ ຮູບພາບໂດຍ: ພະແນກເຕັກໂນໂລຊີ ແລະ ຂໍ້ມູນຂ່າວສານ ອົງການກວດສອບແຫ່ງລັດ.
