ໃນຕອນບ່າຍ ຂອງວັນທີ 01 ເມສາ 2024 ທີ່ ໂຮງແຮມ ລາວພຣາຊ່າ ໄດ້ມີພິທີເປີດ ໂຄງການຊ່ວຍເຫຼືອທາງດ້ານວິຊາການພາຍໃຕ້ໂຄງການ ການສ້າງຄວາມເຂັ້ມແຂງຄວາມອາດສາມາດ ໃນການຈັດຊື້ ແລະ ການຄຸ້ມຄອງການເງິນ ເພື່ອຮັບໃຊ້ສາທາລະນະ ຊຶ່ງບໍລິຫານໂຄງການໂດຍ ທະນາຄານພັດທະນາຊີ (ADB). ໂຄງການດັ່ງກ່າວມີເປົ້າໝາຍເພື່ອ ການສ້າງຄວາມເຂັ້ມແຂງ ໃນວຽກງານການຈັດຊື້ເພື່ອຮັບໃຊ້ສາທາລະນະ ແລະ ວຽກງານການກວດສອບພາກລັດ ຂອງລັດຖະບານແຫ່ງ ສປປ ລາວ. ໜຶ່ງໃນກິດຈະກຳຂອງໂຄງການດັ່ງກ່າວແມ່ນເພື່ອສະໜັບສະໜູນ ອົງການກວດສອບແຫ່ງລັດ ຊື່ງຈະນໍາໃຊ້ທືນປະກອບສ່ວນໃນໂຄງການຈາກອົງການເພື່ອການພັດທະນາສາກົນປະເທດສະຫະລັດອາເມລິກາ (USAID) ທີ່ມີມູນຄ່າ 1 ລ້ານ ໂດລາສະຫະລັດ.
ພິທີເປີດກິດຈະກຳໂຄງການດັ່ງກ່າວໂດຍການເປັນປະທານຮ່ວມຂອງ 3 ພາກສ່ວນ ແລະ ໃຫ້ກຽດກ່າວເປີດໂດຍ ທ່ານ ບຸນເລີດ ເທບວົງສາ, ຮອງປະທານ ອົງການກວດສອບແຫ່ງລັດ ເປັນປະທານ ແລະ ມີຄຳເຫັນໂດຍ ທ່ານ ໄມເຄິລ ຣອນນິ້ງ, ຜູ້ຕາງໜ້າຂອງອົງການ USAID ປະຈໍາ ສປປ ລາວ ແລະ ທ່ານ ນາງ ໂຊໂນມິ ທະນາກະ, ຫົວໜ້າສໍານັກງານທະນາຄານພັດທະນາອາຊີ ປະຈຳ ສປປ ລາວ ຊຶ່ງມີພາກສ່ວນທີ່ກ່ຽວຂ້ອງຈາກ ກະຊວງແຜນການ ແລະ ລົງທຶນ, ກະຊວງການເງິນ, ບັນດາຜູ້ຮ່ວມພັດທະນາ ແລະ ພະນັກງານພາຍໃນອົງການກວດສອບແຫ່ງລັດ ເຂົ້າຮ່ວມທັງໝົດປະມານ 60 ທ່ານ.
ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ ໄດ້ສະແດງຄວາມຍິນດີ ແລະ ພ້ອມທັງໄດ້ສະແດງຄວາມຊົມເຊີຍ ທະນາຄານພັດທະນາອາຊີປະຈຳ ສປປ ລາວ ແລະ ຜູ້ຕາງໜ້າຂອງອົງການເພື່ອການພັດທະນາສາກົນປະເທດສະຫະລັດອາເມລິກາປະຈໍາ ສປປ ລາວ ທີ່ໄດ້ເອົາໃຈໃສ່ເຄື່ອນໄຫວຢ່າງຫ້າວຫັນໃນການປະກອບສ່ວນພັດທະນາເສດຖະກິດ-ສັງຄົມຂອງ ສປປ ລາວ ໃນຫຼາຍຂົງເຂດ ໂດຍເຫັນໄດ້ບົດບາດຄວາມສໍາຄັນ ຂອງວຽກງານການກວດສອບແຫ່ງລັດ ໃນການປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມຂອງ ສປປ ລາວ, ກິດຈະກຳຂອງໂຄງການຊ່ວຍເຫຼືອທາງດ້ານວິຊາການ ສະໜັບສະໜູນແກ່ອົງການກວດສອບແຫ່ງລັດ ເລີ່ມແຕ່ປີ 2024 ຫາ ປີ 2027 ຈະໄດ້ລົງເລິກ 5 ກິດຈະກໍາໃຫຍ່ເຊັ່ນ: 1) ການສ້າງ ແລະ ປັບປຸງປື້ມຄູ່ມືການກວດສອບ; (2) ພັດທະນາຂີດຄວາມສາມາດ ໃຫ້ສະຖາບັນຄົ້ນຄວ້າ ແລະ ຝຶກອົບຮົມການກວດສອບ; (3) ການພັດທະນາຫຼັກສູດ ຂັ້ນຂອງນັກກວດສອບແຫ່ງລັດ ໃຫ້ແກ່ສະຖາບັນຄົ້ນຄ້ວາ ແລະ ຝຶກອົບຮົມການກວດສອບ; (4)ຈັດຊື້ບັນດາອຸປະກອນ ຮັບໃຊ້ວຽກງານການກວດສອບ; ແລະ (5) ສະໜັບສະໜູນໃນການກະກຽມແຜນຍຸດທະສາດ ຂອງອົງການກວດສອບແຫ່ງລັດ ປີ 2026-2030.
ໃນຕອນທ້າຍ, ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ ໄດ້ອວຍພອນ ແລະ ພ້ອມທັງໄດ້ສະແດງຄວາມຊົມເຊີຍຕໍ່ ທ່ານ ໄມເຄິລ ຣອນນິ້ງ ຜູ້ຕາງໜ້າຂອງອົງການເພື່ອການພັດທະນາສາກົນ ປະເທດສະຫະລັດອາເມລິການປະຈໍາ ສປປ ລາວ ແລະ ທ່ານ ນາງ ໂຊໂນມິ ທະນາກະ ຫົວໜ້າສຳນັກງານ ທະນາຄານພັດທະນາອາຊີ ປະຈໍາ ສປປ ລາວ ແລະ ພະນັກງານອົງການກວດສອບແຫ່ງລັດ ປະສົບຜົນສຳເລັດໃນການຈັດຕັ້ງປະຕິບັດໂຄງການດັ່ງກ່າວ
ຮູບພາບ ແລະ ຂ່າວສານໂດຍ: ທະນາຄານພັດທະນາອາຊີ ປະຈຳລາວ (ADB)
