ໃນຕອນບ່າຍຂອງວັນທີ 05 ກັນຍາ 2024 ທີ່ ອົງການກວດສອບແຫ່ງລັດ, ສະຫາຍ ວຽງທະວີສອນ ເທບພະຈັນ ກຳມະການສຳຮອງສູນກາງພັກ, ປະທານອົງການກວດສອບແຫ່ງລັດ ສປປ ລາວ ໄດ້ໃຫ້ກຽດຕອນຮັບຮັບການເຂົ້າຢ້ຽມຂໍານັບຂອງ ສະຫາຍ ມ່າ ເວີນຮຸຍ, ຮອງປະທານສຳນັກງານກວດສອບແຫ່ງຊາດ ສປ ຈີນ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວ ຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 05-08 ກັນຍາ 2024 ນີ້.
ໃນໂອກາດດັ່ງກ່າວ, ສະຫາຍ ວຽງທະວີສອນ ເທບພະຈັນ, ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ສະຫາຍ ມ່າ ເຫວີນຮຸ່ຍ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍ່ຄືສອງອົງການກວດສອບແຫ່ງລັດ, ເວົ້າສະເພາະ ການພົວພັນຮ່ວມມືດ້ານວຽກງານກວດສອບແຫ່ງລັດໃຫ້ນັບມື້ແໜ້ນແຟ້ນຍິ່ງໆຂຶ້ນ ພ້ອມດຽວກັນນັ້ນ, ສະຫາຍ ວຽງທະວີສອນ ຍ້ອງຍໍຊົມເຊີຍ ແລະ ຕີລາຄາສູງ ຕໍ່ໝາກຜົນຂອງການຮ່ວມມືລະຫວ່າງສອງອົງການກວດສອບແຫ່ງລັດ ໃນໄລຍະປີຜ່ານມາເປັນຕົ້ນ: 1)ໄດ້ມີການແລກປ່ຽນພົບປະຢ້ຽມຢາມການນຳຂັ້ນສູງ ລະຫວ່າງ ສອງອົງການກວດສອບແຫ່ງລັດ ຢ່າງເປັນປົກກະຕິ; 2) ການສ້າງຄວາມເຂັ້ມແຂງໃຫ້ແກ່ພະນັກງານອົງການກວດສອບແຫ່ງລັດ ສປປ ລາວ ດ້ວຍຫຼາຍຮູບວິທີຄື: ການຝຶກອົບຮົມ, ການສຳມະນາ, ການໄປທັດສະນະສຶກສາ ທັງຢູ່ ສຳນັກງານກວດສອບແຫ່ງຊາດ ສປ ຈີນ ແລະ ຢູ່ບັນດາສຳນັກງານກວດສອບປະຈຳພາກ; 3) ໄດ້ໃຫ້ທຶນຍົກລະດັບການສຶກສາລະດັບປະລິນຍາໂທ ແກ່ພະນັກງານອົງການກວດສອບແຫ່ງລັດຢ່າງເປັນປົກກະຕິ ແລະ 4) ໄດ້ໃຫ້ການສະໜັບສະສະໜູນເຊິ່ງກັນ ແລະ ກັນ ໃນເວທີພາກພື້ນ ແລະສາກົນ. ໝາກຜົນທີ່ທີ່ເກີດຂຶ້ນໄດ້ ກໍຍ້ອນການຮ່ວມມືທີ່ດີ ການສະໜັບສະໜູນ ແລະ ການຊ່ວຍເຫຼືອ ຂອງສຳນັກງານກວດສອບແຫ່ງຊາດ ສປ ຈີນ ເຊິ່ງໄດ້ປະກອບສ່ວນອັນສໍາຄັນໃຫ້ແກ່ການພັດທະນາ ແລະ ສ້າງຄວາມເຂັ້ມແຂງໃຫ້ແກ່ວຽກງານກວດສອບແຫ່ງລັດ ຂອງ ສປປ ລາວ ຕາມແນວທາງການເປັນຄູ່ຊາຕາກຳລາວ-ຈີນ.
ພາຍຫຼັງສໍາເລັດການຢ້ຽມຂ້ຳນັບແລ້ວ, ໄດ້ມີກອງປະຊຸມພົບປະສອງຝ່າຍ ລະຫວ່າງ ສອງອົງການກວດສອບແຫ່ງລັດ ຝ່າຍລາວນຳໂດຍ: ສະຫາຍ ຕ້ອຍ ພົນທິລາດ ຮອງປະທານອົງການກວດສອບແຫ່ງລັດ ພ້ອມດ້ວຍຄະນະ ແລະ ຝ່າຍ ສປ ຈີນ ນຳໂດຍ: ສະຫາຍ ມ່າ ເຫວີນຮຸ່ຍ ຮອງປະທານສຳນັກງານກວດສອບແຫ່ງຊາດ ສປ ຈີນ ພ້ອມດ້ວຍຄະນະ ໃນການພົບປະໃນຄັ້ງນີ້ທັງສອງຝ່າຍໄດ້ແຈ້ງກ່ຽວກັບສະພາບການເຄື່ອນໄຫວທີ່ພົ້ນເດັ່ນຂອງວຽກງານການກວດສອບ ພ້ອມທັງທົບທວນຜົນສໍາເລັດ ແລະ ທິດທາງການຮ່ວມມືໃນຕໍ່ໜ້າ. ພ້ອມນັ້ນ,ໄດ້ປຶກສາຫາລືບັນຫາຕ່າງໆເປັນຕົ້ນ: 1) ການເພີ່ມທະວີການພົວພັນຮ່ວມມືໃນວຽກງານກວດສອບແຫ່ງລັດ; 2) ການແລກປ່ຽນຂໍ້ມູນຂ່າວສານທາງດ້ານວຽການກວດສອບ; 3) ການສ້າງຄວາມເຂັ້ມແຂງວຽກງານສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ; ແລະ 4) ການສ້າງຄວາມເຂັ້ມແຂງໃຫ້ແກ່ພະນັກງານອົງການກວດສອບປະຈຳພາກ ໂດຍສະເພາະການຮ່ວມມືລະຫວ່າງອົງການກວດສອບປະຈຳພາກເໜືອ ກັບ ສຳນັກງານກວດສອບປະຈຳແຂວງຢູນນານ.
ໃນວັນທີ່ 06 ກັນຍາ 2024 ສະຫາຍ ມ່າ ເຫວີນຮຸ່ຍ ຮອງປະທານອົງການກວດສອບແຫ່ງລັດ ພ້ອມດ້ວຍຄະນະຜູ້ແທນຈະສືບຕໍ່ໄປເຄື່ອນໄຫວຢ້ຽມຢາມສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ພ້ອມນັ້ນ ໄດ້ຈັດກອງປະຊຸມແລກປ່ຽນບົດຮຽນດ້ານວິຊາການ ລະຫວ່າງສອງອົງການກວດສອບແຫ່ງລັດໃນ 02 ຫົວຂໍ້ຄື: 1) ການກວດສອບການຄຸ້ມຄອງຄັງເງິນແຫ່ງຊາດ ແລະ 2) ການກວດສອບນະໂຍບາຍທາງດ້ານການເງິນ.
ໃນໂອກາດການມາເຄື່ອນໄຫວດັ່ງກ່າວ ໃນວັນທີ 07 ມີນາ 2024 ສະຫາຍ ມ່າ ເຫວີນຮຸ່ຍ ຮອງປະທານອົງການກວດສອບແຫ່ງລັດ ພ້ອມດ້ວຍຄະນະ ຈະສືືບຕໍ່ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ອົງການກວດສອບແຫ່ງລັດ ປະຈໍາພາກເໜືອ 1 ທີ່ແຂວງ ຫຼວງພະບາງ ເພື່ອພົບປະ ແລະ ແລກປ່ຽນບົດຮຽນທາງດ້ານວິຊາການກວດສອບ ແລະ ປຶກສາຫາລືທິດທາງແຜນການຮ່ວມມືໃນຕໍ່ໜ້າ.
ຮູບພາບ ແລະ ຂ່າວສານໂດຍ: ພະແນກເຕັກໂນໂລຊີ ແລະ ຂໍ້ມູນຂ່າວສານ, ອົງການກວດສອບແຫ່ງລັດ
